11 მაისს თბილისი დოკუმენტური ფილმების ფესტივალს კიდევ ერთხელ უმასპინძლებს, წარმოგიდგენთ საერთაშორისო საკონკურსო სექციის ჟიურის ვინაობას.

გიდრე ბეინორუტე

გიდრემ 2002 წელს ლიტვის მუსიკისა და თეატრის აკადემიის კინოსა და ტელევიზიის ფაკულტეტის მაგისტრატურა აუდიოვიზუალურ ხელოვნებაში დაამთავრა. გადაიღო რვა მხატვრული და დოკუმენტური, მოკლე და საშუალომეტრაჟიანი ფილმი, რომლებიც ადგილობრივ და საერთაშორისო დონეზეა აღიარებული. მისმა დოკუმენტურმა ფილმებმა – საუბრები სერიოზულ საკითხებზე და ვულკანოვკა, გრანდ სინემას შემდეგ რამდენიმე ჯილდო მიიღო უკრაინაში, ბელორუსიაში, პორტუგალიასა და ლიტვაში. 2007 წლიდან გიდრე ასწავლის სცენარის წერასა და რეჟისურას ლიტვის მუსიკისა და თეატრის აკადემიაში. ამავდროულად ის ლიტვის კინოხელოვანთა კავშირის და ევროპული კინო-აკდემიის წევრია.

ული პფაუ

ული პფაუმ კარიერა 1978 წელს, შტუტგარდტში, ტელევიზიაში, დოკუმენტური ფილმების და მუსიკალური პროგრამების რეჟისორად დაიწყო. 1995 წელს მან პროდიუსერობას მიჰყო ხელი და მუშაობდა EuroArts Medien AG-ისთვის. 2003 წელს, ის EIKON Media Berlin-ში დოკუმენტური ფილმების ხელმძღვანელად დაინიშნა. 2017 წლიდან ული დოკუმენტური ფილმების პროდიუსერია. თავისი კარიერის განმავლობაში ული პფაუ დაახლოებით 150 ფილმის პროდიუსერი და თანაპროდიუსერი იყო.

გენადი კოფმანი

კოფმანი პროდიუსერი, Docudays UA-ს პროგრამების დირექტორი და უკრაინის კინემატოგრაფიის ეროვნული სააგენტოს ექსპერტია. 90-იან წლებში მან დააარსა MaGiKa Film Company, ერთ-ერთი პირველი დამოუკიდებელი საპროდიუსერო კომპანია უკრაინაში. 2003 წლიდან ის არის ადამიანების უფლებების საერთაშორისო ფესტივალის Docudays UA-ს ერთ-ერთი დამაარსებელი. კოფმანი ოცზე მეტი დოკუმენტური ფილმის რეჟისორი და 35 ფილმის პროდიუსერია, მათ შორის: ევროს მიღმა (Beyond the Euro), ცისარტყელა ყარყუმის უდაბნოს ცაზე (Rainbow Over the Karakum Desert), ვაგრიჩი და შავი კვადრატი (Vagrich and the Balck Square), მუდმივი ცეცხლი (The Living Fire).

ნანა დოლიძე

ნანა დოლიძე კინომცოდნე, ხელოვნებათმცოდნეობის დოქტორი, საქართველოს კინოაკადემიის წევრი და საქართველოს შოთა რუსთაველის სახელობის თეატრისა და კინოს სახელმწიფო უნივერსიტეტის ასოცირებული პროფესორია. წლების განმავლობაში მუშაობდა სხვადასხვა ტელეკომპანიაში, არის კინოსა და ტელევიზიის მიმართულებით 20-ზე მეტი სამეცნიერო ნაშრომის ავტორი. უნივერსიტეტის პარალელურად, 2013 წლიდან, ის საქართველოს კულტურისა და ძეგლთა დაცვის სამინისტროში მუშაობს, სადაც კინოს მიმართულებას, და სხვა განხორციელებულ მნიშვნელოვან პროექტებთან ერთად, 2016 წლიდან, ქართული კინომემკვიდრეობის სამშობლოში დაბრუნებისა და დაცვის პროექტს კურირებს.

ოქსანა სარქისოვა

ოქსანა სარქისოვა Blinken OSA-ს არქივების მკვლევარია ევროპის ცენტრალურ უნივერსიტეტში, გამოქვეყნებული აქვს სტატიები კინოს ისტორიაზე, ნაციონალისტურ პოლიტიკაზე, თანამედროვე რუსულ და აღმოსავლეთ ევროპულ კინოზე და სამოყვარულო ფოტოგრაფიაზე. ის იყო მიწვეული პროფესორი ეოტვოს ლორანდ უნივერსიტეტში და ვილიამს კოლეჯში.

ბარბორა ჰუდეჩკოვა

ბარბორა ჰუდეჩკოვა ადამიანის უფლებების საერთაშორისო ფესტივალის, One World-ის პროგრამებისა და რეგიონალური ჩვენებების კოორდინატორია. მონაწილეობს ფილმების შესარჩევ პროცესში და პასუხისმგებელია ჩეხეთის კონკურსის კატეგორიების განსაზღვრაზე. ბოლო 19 წლის განმავლობაში One World გახდა ადამიანის უფლებების ყველაზე დიდი ფესტივალი მსოფლიოში. ფესტივალის პროგრამა აერთიანებს ფილმებს პოლიტიკურ მიზეზებსა და განვითარებაზე, სოციალურ თემებზე, გარემოს დაცვასა და ცხოვრების სტილზე.

დანიელ აბმა

დანიელ აბმა დაწყებითი განათლების დასრულების შემდეგ ბერლინში გადავიდა, სადაც ახალგაზრდებთან მუშაობდა და რეჟისურის შესწავლა დაიწყო. მისი პირველი სრულმეტრაჟიანი დოკუმენტური ფილმი Beyond Wrienzen არაერთ საერთაშორისო ფესტივალზე აჩვენეს და მრავალი ჯილდოც მოიპოვა, მათ შორის, პრესტიჟული გერმანული პრემია Grimme. მისი სადებიუტო ფილმი ტრანზიტ ჰავანა 2016 წელს გამოვიდა ჰოლანდიის და გერმანიის კინოთეატრებში. დანიელი იღებს პერსონაჟზე აწყობილ დოკუმენტურ ფილმებს სოციალურ საკითხებზე, რომლებიც ხანგრძლივი დაკვირვების შედეგია. კინოს გარდა, ის მუშაობს, როგორც მასწავლებელი, ატარებს ტრენინგებსა და ლექციებს დოკუმენტური ფილმების გადაღებაზე.