უელსში ახალი კანონი მიიღეს, რომელიც ბავშვისთვის დარტყმას კრძალავს. იმ შემთხვევაში, თუ ვინმე დაინახავს, რომ მშობელი ან სხვა პირი ბავშვს ფიზიკურად სჯის, აუცილებელია, სოციალურ სამსახურს ან პოლიციას დაუკავშირდეს.

ახალს კანონს, რომელიც ძალაში ორშაბათს შევიდა, უელსის ლეიბორისტულმა პარტიამ "ისტორიული" უწოდა და აღნიშნა, რომ ბავშვთა უფლებების დასაცავად უმჯობესია, ინგლისმაც იგივე გააკეთოს.

ახალი კანონი არალეგალურად ცნობს ბავშვის ფიზიკური დასჯის ყველა ფორმას, მათ შორის დარტყმას, სახეში გარტყმას, თუ სხვა სახის უხეს შეხებას. კანონი გავრცელდება როგორც უელსის მაცხოვრებლებზე, ასევე იქ ჩასულ ტურისტებსა და სხვა ადამიანებზეც.

ფოტო: Getty Images

"დღეს უელსში ბავშვთა უფლებებისთვის ისტორიული მომენტია, რადგან ფიზიკური დასჯა წარსულში რჩება. ჩვენს მოქალაქეებს ჯაშუშად ქცევას არ ვთხოვთ, არამედ გვსურს, რომ ბავშვებზე ზრუნვა მთელი საზოგადოების პასუხისმგებლობა გახდეს", — განაცხადა სოციალური სერვისების მინისტრის მოადგილემ, ჯული მორგანმა.

უელსის მთავრობის ვებგვერდზე დამატებული სიახლიდან ნათლად ჩანს, რომ ვინც ბავშვს ფიზიკურად გაუსწორდება, მას პატიმრობა და თავდასხმაში ბრალდებით საქმის აღძვრა ემუქრება. ვებგვერდზე განთავსებულია ინსტრუქცია, თუ როგორც უნდა მოიქცეს ადამიანი, რომელიც ბავშვზე ძალადობის ფაქტს შეესწრება.

"უელსი იმ 60 ქვეყანას შეუერთდა, რომლებიც ბავშვის ფიზიკურ დასჯას კრძალავს. თუ ზრდასრულთა და ცხოველთა ფიზიკური დასჯა მიუღებელია, აბსურდია, რომ ბავშვები კანონის მეშვეობით არ დავიცვათ", — დასძინა მინისტრის მოადგილემ.