პრეზიდენტის, სალომე ზურაბიშვილის განცხადებით, რუსეთის მოქალაქეების საქართველოში შემოსვლაზე გაკეთებული ოფიციალური განცხადებები, რომლითაც ეთნიკური ნიშნით დისკრიმინაციაზე აპელირებენ, დამაზიანებელია.

მისივე თქმით, ხელისუფლება ვალდებულია საზოგადოებას სანდო ინფორმაცია მიაწოდოს იმაზე, რომ სამოქალაქო წესრიგი სათანადოდაა უზრუნველყოფილი.

"სენსიტიური საკითხია ქვეყანაში რუსეთიდან მოქალაქეების შემოსვლა, რომელიც არ უნდა გახდეს არც ჩვენი დაყოფის, არც ქვეყნის რეპუტაციის შელახვის და არც პანიკის მიზეზი. აქაც უნდა შევინარჩუნოთ დაბალანსებული პოზიცია. ამ მხრივ, დამაზიანებელია ის ოფიციალური განცხადებები, რომლებიც საქართველოში ეთნიკური დისკრიმინაციის საფრთხეზე აპელირებენ ნაცვლად ამისა, ხელისუფლება ვალდებულია საზოგადოებას მიაწოდოს ზუსტი და დროული ინფორმაცია და დაარწმუნოს იმაში, რომ სამოქალაქო წესრიგი სათანადოდაა უზრუნველყოფილი, როგორც საზღვარზე, ასევე ქვეყანაში", — განაცხადა მან.

4 მარტს ქართული ოცნების ლიდერმა, ირაკლი კობახიძემ ბრიფინგი გამართა, სადაც განაცხადა, სადაც რუსეთის მოქალაქეებისადმი დისკრიმინაციაზე ისაუბრა. მისი მტკიცებით, საქართველოში რუსი მოქალაქეების მიმართ ენმ-მ და მასთან "დაკავშირებულმა" არასამთავრობო ორგანიზაციებმა წამოიწყეს კამპანია, რომელიც დისკირმინაციისა და შოვინიზმის ძალზე უხეში გამოვლინებაა. მისივე თქმით, პარლამენტმა კანონპროექტის გამკაცრებაზე დაიწყო მუშაობა, რომელიც ეთნიკური ნიშნით დისკრიმინაციისა და ეთნიკური შუღლის გაღვივების წინააღმდეგ იქნება მიმართული.

7 მარტს ეკონომიკის მინისტრმა, ლევან დავითაშვილმა განაცხადა, რომ საქართველოს საზღვარი 20-25 000-მა რუსეთის მოქალაქემ გადმოკვეთა. დავითაშვილმა ეს განცხადება მთავრობის სხდომის შემდეგ გამართულ ბრიფინგზე გააკეთა.

მას შემდეგ, რაც გავრცელდა ინფორმაცია, რომ საქართველოში რუსეთის მოქალაქეები აპირებენ ჩამოსვლას, ამას საზოგადოების პროტესტი მოჰყვა. ბევრმა ადამიანმა თქვა, რომ მათთვის ბინების გაქირავებაზე უარს იტყვიან.