მმართველი გუნდის თავმჯდომარემ, ირაკლი კობახიძე ბრიფინგი გამართა, რომელზეც რუსეთის მოქალაქეებისადმი დისკრიმინაციაზე ისაუბრა და ნაციონალურ მოძრაობას "ომის პარტია" უწოდა. კობახიძე ამტკიცებს, რომ საქართველოში რუსი მოქალაქეების მიმართ ენმ-მ და მასთან "დაკავშირებულმა" არასამთავრობო ორგანიზაციებმა წამოიწყეს კამპანია, რომელიც დისკირმინაციისა და შოვინიზმის ძალზე უხეში გამოვლინებაა.

"განსაკუთრებით შემაშფოთებელია ის გარემოება, რომ ამ კამპანიაში, რომელიც დისკრიმინაციისა და შოვინიზმის ძალზე უხეში გამოვლინებაა, ჩართული არიან ნაციონალურ მოძრაობასთან დაკავშირებული ე.წ. არასამთავრობო ორგანიზაციებიც, რომელთა ერთ-ერთი უმთავრესი მისია სწორედ რომ დისკრიმინაციის ყველა ფორმის აღკვეთა და ეთნიკური შუღლის გაღვივების პრევენცია უნდა იყოს. აქვე აღვნიშნავთ, რომ წარმოებული კამპანია უხეშად არღვევს საქართველოს კონსტიტუციის მე-11 მუხლს, რომელიც ეთნიკური ნიშნით დისკრიმინაციას ყოველგვარი დათქმის გარეშე კრძალავს", — აცხადებს ის.

ქართული ოცნების თავმჯდომარე ირწმუნება, რომ საქართველო ერთადერთი ქვეყანაა, სადაც რუსი ეროვნების მოქალაქეების ეთნიკური ნიშნით დისკრიმინაციაზე ამ მასშტაბის კამპანიაა წარმოწყებული. კობახიძე ამბობს, რომ ეთნიკური ნიშნით დისკრიმინაცია გაუგონარი მოვლენაა და "ამგვარი მიდგომით ევროკავშირის წევრი ვერ გავხდებით".

"გარდა ამისა, ეს არ არის ქართული კულტურის ნაწილი. შესაბამისად, ძალზე ლოგიკურია, რომ დისკრიმინაციული კამპანიის ავტორები სწორედ ის ადამიანები არიან, რომლებიც გამსჭვალული არიან საერთო ზიზღით ქართული კულტურისა და ზოგადად, ქართველობის მიმართ და მათი კამპანიის უკან კონკრეტული ანტისახელმწიფოებრივი მიზნები დგას", — თქვა მან.

ის, ასევე, აცხადებს, რომ ფიქსირდება შემთხვევები, როდესაც კერძო კომპანიები რუსი ეროვნების მოქალაქეებს მომსახურებაზე უარს ეუბნებიან, ან დისკრიმინაციულ დათქმებს უწესებენ. მისი თქმით, ეს სერიოზული საფრთხეა და ის, შესაძლოა, რუსი ეროვნების მოქალაქეების ფიზიკურ შეურაცხყოფაში გადაიზარდოს. ამასთან, მოუწოდა სამართალდამცავ ორგანოებს მსგავსი ქმედებების პრევენციისა და აღკვეთისთვის "ყველა ზომა მიიღონ".

"მოვუწოდებთ სამართალდამცავ ორგანოებს, მიიღონ ყველა ზომა ყოველგვარი ფიზიკური დაპირისპირებისა და ეთნიკური შუღლის გაღვივების მცდელობის პრევენციისა და აღკვეთისათვის. ამგვარი ქმედების ყველა ჩამდენი კანონის მთელი სიმკაცრით უნდა დაისაჯოს. აქვე, მკაფიოდ უნდა აღინიშნოს, რომ საქართველოში უცხო ქვეყნის მოქალაქეების ჭარბი რაოდენობით შემოსვლასთან დაკავშირებულ ყველა შესაძლო რისკს, რაზეც ყურადღებას ამახვილებს საზოგადოების ის ნაწილი, რომელიც გულწრფელად ღელავს ამ თემაზე, სრულად დააზღვევს საქართველოს ხელისუფლება", — აცხადებს ის.

ამასთან, კობახიძე აღნიშნავს, რომ რუსეთში 800 ათასამდე, ხოლო ოკუპირებულ ტერიტორიებზე 10 ათასობით ქართველი ცხოვრობს და დასძენს, რომ რუსი მოქალაქეების მიმართ მსგავსი მიდგომა მათ უქმნის საფრთხეს.

მას შემდეგ, რაც კობახიძემ რუსეთის მოქალაქეების მიმართ საქართველოში დაწყებული "დისკრიმინაციული" კამპანიის შესახებ ისაუბრა, თქვა, რომ პარლამენტმა კანონპროექტის გამკაცრებაზე დაიწყო მუშაობა, რომელიც ეთნიკური ნიშნით დისკრიმინაციისა და ეთნიკური შუღლის გაღვივების წინააღმდეგ იქნება მიმართული.

"დასასრულს, საქართველოს ხელისუფლება ყველაფერს გააკეთებს საქართველოსთვის ომის თავიდან ასარიდებლად, ქვეყანაში მშვიდობისა და უსაფრთხოების დასაცავად და ყველა მიმართულებით სახელმწიფოებრივი რისკების დასაზღვევად", — თქვა მან ბოლოს.

მას შემდეგ, რაც გავრცელდა ინფორმაცია, რომ საქართველოში რუსეთის მოქალაქეები აპირებენ ჩამოსვლას, ამას საზოგადოების პროტესტი მოჰყვა. ბევრმა ადამიანმა, რომ მათთვის ბინების გაქირავებაზე უარს იტყვიან.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში