რუსეთის უკრაინაში შეჭრასა და სრულმასშტაბიანი ომის დაწყებას მოდის ქართველი დიზაინერი, დემნა გვასალია, ეხმაურება. გვასალია, რომელიც სოხუმში დაიბადა და 1990-იან წლებში განვითარებული მოვლენების შემდეგ თავადაც იქცა ლტოლვილად, დღეს უკვე ცნობილი ფრანგული ბრენდის, Balenciaga-ის შემოქმედებითი ხელმძღვანელია. განცხადება სწორედ ბალენსიაგას ინსტაგრამგვერდზე გამოქვეყნდა.

"უკრაინაში მიმდინარე ომმა ჩემში იმ წარსული ტრავმის ტკივილი გააღვიძა, რომელიც 1993 წლიდან მომყვება — მას შემდეგ, რაც ჩემს ქვეყანაში იგივე მოხდა და მე სამუდამოდ ლტოლვილად ვიქეცი. სამუდამოდ იმიტომ, რომ ეს რაღაც ყოველთვის შენში რჩება. შიში, სასოწარკვეთილება და იმის გააზრება, რომ არავის სჭირდები. თუმცა, მე ისიც გავიაზრე, რა არის ცხოვრებაში მნიშვნელოვანი — ყველაზე მნიშვნელოვანი, როგორიცაა სიცოცხლე, ადამიანური სიყვარული და თანაგრძნობა.

გვასალიას თქმით, ამ ყველაფრის გათვალისწინებით მისთვის განსაკუთრებულად რთული იყო ამ კვირას დაგეგმილ შოუზე მუშაობა.

"ასეთ დროს მოდა რელევანტურობასა და არსებობის უფლებასაც კი კარგავს. მოდის კვირეული რაღაც უაზრობას ემსგავსება. წუთით ისიც ვიფიქრე, გამეუქმებინა შოუ, რომელზეც მე და ჩემმა გუნდმა ბევრი ვიშრომეთ და რომელსაც მოუთმენლად ველოდით. თუმცა, შემდეგ მივხვდი, რომ შოუს გაუქმება დანებება იქნებოდა — იმ ბოროტების მორჩილება, რომელიც უკვე 30 წელია, დიდ ტკივილს მაყენებს. გადავწყვიტე, რომ ჩემს წილს აღარასდროს შევწირავ ეგოსთან გამართულ ამ უაზრო, უგულო ომს.

ქართველი დიზაინერი დასძენს, რომ შოუ დამატებით ახსნას არ საჭიროებს და "ის უშიშრობას, შეუპოვრობასა და სიყვარულისა და მშვიდობის ტრიუმფს ეძღვნება".

რამდენიმე დღის წინ ბალენსიაგამ უკრაინისადმი სოლიდარობისა და მხარდაჭერის ნიშნად ინსტაგრამიდან ყველა ფოტო წაშალა და მათ ნაცვლად ქვეყნის დროშის სურათი გამოაქვეყნა.

აღსანიშნავია, რომ საქართველოს უახლესი წარსულის თემა გვასალიასთვის ინსპირაციადაც ქცეულა. როცა დიზაინერი Vetements ხელმძღვანელობდა, 2019 წლის გაზაფხული-ზაფხულის კოლექციაში წარმოდგენილი ნამუშევრები სწორედ საქართველოს, ცოტა ხნის წინ გადატანილ ომებსა და ოკუპაციის თემას მიეძღვნა.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში