უკრაინის პრეზიდენტს, ვოლოდიმირ ზელენსკის New York Time-ის ჟურნალისტმა რუსულ ენაზე ჰკითხა, იცის თუ არა, რომ ახლა მთელი მსოფლიო მას ძალიან სცემს პატივს, როგორც სიმამაცის სიმბოლოს, და ადამიანს, რომელიც დემოკრატიას იცავს და ეხმარება თუ არა ეს უკრაინას.

კითხვას ზელენსკიმ რუსულადვე უპასუხა და განაცხადა, რომ ძალიან ეხმარება, ეს დიდი მხარდაჭერაა.

"ეს დიდი მხარდაჭერაა, პირველ რიგში, ის რასაც ჩემგან უკრაინელი ხალხი ელოდა, სიმართლე გითხრათ, არ მინდა ვილაპარაკო იმაზე, როგორი ვიყავი და როგორი გავხდი. მე ვფიქრობ, რომ ყველა ასეთი ვართ, ვისაც უყვარს საკუთარი ქვეყანა — შენ ხარ იმ ადგილას, სადაც ყველაზე უფრო შეგიძლია სახელმწიფოს და ხალხის დახმარება, მე სწორედ ამას ვაკეთებ. მე ვარ სწორედ ამ ადგილას", — თქვა მან.

უკრაინის პრეზიდენტი აცხადებს, რომ მისთვის ეს მხარდაჭერა ძალიან მნიშვნელოვანია. მისი თქმით, ეს მათ ძლიერ თავდაჯერებას მატებს.

"დიახ, ჩემთვის ძალიან მნიშვნელოვანია ეს მხარდაჭერა და მინდა მივმართო მსოფლიოს, და ამ შესანიშნავ ხალხს, მთელ მსოფლიოში, რომ ეს მხარდაჭერა არ შემცირდეს. იმიტომ, რომ ის ძლიერ თავდაჯერებას გვმატებს. ის არ დამასუსტებს ხოლმე, რომც არ იყოს, ჩვენ მშვიდობის ხალხი ვართ, ჩვენ არ ვართ მზად დავნებდეთ, მაგრამ ეს მხარდაჭერა ამბობს, რომ ჩვენ ყველაფერს სწორად ვაკეთებთ. ამაში არის სულის ძალა, მშვიდობის ძალა და ძალიან მიხარია, რომ მსოფლიო გაერთიანდა. სამწუხაროა, რომ ამ ფასად", — დასძენს ის.

მისივე თქმით, ის და მსოფლიოს ბევრი ლიდერი ძლიერ მეგობრად იქცნენ. დღეში რამდენჯერმე ურეკვას მათ და ესაუბრება.

"ძალიან მომწონს, რომ ლიდერებს შემიძლია WhatsApp-ში ველაპარაკო, ყოველგვარი ბიუროკრატიული *ლეობის გარეშე. როცა რთულია რაღაცის შეკვეთა, მერე ლოდინიც რთულია, მერე კიდევ "ერთი კვირა დაიცადე" და ამ დროს ხალხი კვდება. ახლა კი სრულიად განსხვავებული მომენტია", — ამბობს უკრაინის პრეზიდენტი.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში