Amnesty International-ის განცხადებით, რუსი სამხედროები განურჩევლად ყველას ესხმიან თავს. ორგანიზაციის თქმით, ისინი უკრაინაში საერთაშორისო ჰუმანიტარულ სამართალს არღვევენ.

მათი თქმით, რუსი სამხედროები არაფრად აგდებდნენ მოქალაქეების სიცოცხლეს და მჭიდროდ დასახლებულ რეგიონებში ბალისტიკურ რაკეტებს, თუ სხვა ასაფაეთქებელ იარაღებს იყენებდნენ. Amnesty International ხაზს უსვამს, რომ რუსი სამხედროები თავს ეხმოდნენ საავადმყოფოებსაც.

"რუსეთის ხელისუფლებამ, რომელიც მცდარად ამტკიცებს, რომ მხოლოდ ზუსტად მართვად იარაღებს იყენებს, ამ ქმედებებზე პასუხისმგებლობა უნდა აიღოს", — ვკითხულობთ განცხადებაში.

ორგანიზაციამ დღეს 3 ინციდენტი დააფიქსირა, რამაც, სულ მცირე, 6 მშვიდობიანი მოქალაქე იმსხვერპლა, დაშავდა — 12. მატივე თქმით, 24 თებერვალს, შეჭრის პირველ საათებში ბალისტიკური ბომბი დონეცკის რეგიონში, ვუჰლედარში საავადმყოფოსთან ჩამოაგდეს. შედეგად დაიღუპა 4 და დაიჭრა 10 სამოქალაქო პირი. ადგილობრივმა წყარომ ორგანიზაციის მკვლევარს უთხრა, რომ მოკლული 2 ქალი და 2 კაცია. დაშავებულებს შორის კი 6 საავადმყოფოს თანამშრომელია.

Amnesty International განცხადებით, ორგანიზაციის მკვევარმა ანალიზით დაადგინა, რომ ეს 9M79 Tochka ბალისტიკური ბომბი იყო, რაც უკიდურესად არაზუსტია — ნახევარი კილომეტრით მუდმივად ცდება სამიზნეებს და დასახლებულ ადგილებში გამოყენება დაუშვებელია.

ორგანიზაცია წერს, რომ კიდევ ერთი თავდასხმა ადგილობრივი დროით, დილის 8 საათზე ხარკოვის რეგიონში მოხდა. სავარაუდო სამიზნე ახლომდებარე საავიაციო ბაზა იყო, მაგრამ მის ნაცვლად იარაღი საცხოვრებელ კორპუსს მოხვდა. მათივე ცნობით, შედეგად, სავარაუდოდ, სამი მშვიდობიანი მოქალაქე დაიღუპა.

Amnesty International გაეროს გენერალურ ასამბლეას მოუწოდებს, შეიკრიბოს და საგანგებო სესიაზე მიიღოს რეზოლუცია, რომელიც რუსეთის უკანონო თავდასხმას დაგმობს.

"მილიონობით მოქალაქის სიცოცხლე, უსაფრთხოება და კეთილდღეობა საფრთხეშია", — აცხადებენ ისინი.

კრემლში ამტკიცებენ, თითქოს მშვიდობიან მოსახლეობას თავს არ ესხმიან, რაც ტყუილია— იბომბება დასახლებები, ბაღები, სკოლები, საავადმყოფოები. რუსეთმა უკრაინას სხვადასხვა ტერიტორიიდან შეუტია და ახლა საომარი მოქმედებები ქვეყნის არაერთ რეგიონსა და ქალაქში მიმდინარეობს, მათ შორის, კიევის ოლქთან. ორივე მხარეს არის დანაკარგები — დაიღუპა ასეულობით მშვიდობიანი მოქალაქე და სამხედრო პირი.

რუსული ჯარები ცდილობენ ხელში ჩაიგდონ მნიშვნელოვანი ობიექტები, უკრაინა მათ წინააღმდეგობას უწევს. სამხედრო მოქმედებებს თან ახლავს კიბერშეტევები, დეზინფორმაციისა და პროპაგანდის ტალღა.

ვოლოდიმირ ზელენსკიმ ქვეყანაში ჯერ სამხედრო მდგომარეობა, შემდეგ კი საყოველთაო მობილიზაცია გამოაცხადა და თქვა, რომ იარაღს მისცემენ ყველას, ვისაც ქვეყნის დაცვა ენდომება. ზელენსკიმ არაერთხელ მოუწოდა პარტრნიორებს დახმარებისა და სერიოზული ნაბიჯების გადადგმისკენ და აღნიშნა, რომ ომი არამხოლოდ უკრაინაში, არამედ ევროპაშია.

ევროკავშირმა, აშშ-მ, დიდმა ბრიტანეთმა, კანადამ, იაპონიამ, ავსტრალიამ, სამხრეთ კორეამ, ტაივანმა, ახალმა ზელანდიამ, გერმანიამ რუსეთს სანქციები დაუწესეს, რომელიც მოიცავს ფინანსურ შეზღუდვებს ფიზიკურ და იურიდიულ პირებზე, რუსულ ელიტაზე, ოლიგაქრებზე, მსხვილ ბანკებზე, ავიაკომპანიებზე. უკრაინა უფრო ეფექტური ნაბიჯების გადადგმას ითხოვს.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში