მსოფლიოში ერთ-ერთმა ყველაზე ცნობილმა ჰაკერულმა ჯგუფმა, Anonymous-მა ტვიტერზე გაზპრომი მონიშნა და ჰკითხა — გინდა ვითამაშოთ? ამის შემდეგ, კომპანიის ვებგვერდი გაითიშა.

"გაზპრომი გათიშულია უკრაინაში მცხოვრები ხალხის მხარდასაჭერად", — წერენ ისინი.

გაზპრომი ერთ-ერთი ყველაზე დიდი რუსული კომპანიაა, რომელიც ბუნებრივ აირს აწარმოებს. რუსეთი ხშირად იყენებს ბუნებრივ აირს პოლიტიკური მიზნების მისაღწევად. პუტინის მხრიდან უკრაინაზე თავდასხმის შემდეგ რუსული კომპანიების აქციების ღირებულება რეკორდულად მცირდება, სწორედ მათ შორისაა გაზპრომი.

Anonymous-მა რუსეთს "კიბერომი გამოუცხადა". გუშინ მათ რუსული პროპაგანდისტული მედია Russia Today დაბლოკეს.

რუსეთში კომპიუტერული ინციდენტების ნაციონალურ საკოორდინაციო ცენტრში, რომელიც FSB-ს შექმნილია, კიბერთავდასხმების მასშტაბი კრიტიკულად შეაფასეს. მათი თქმით, თავდასხმების ინტენსივობა გაიზარდა, მათ შორის "კრიტიკული მნიშვნელობის საინფორმაციო ინფრასტრუქტურის ობიექტებზე".

კრემლში ამტკიცებენ, თითქოს მშვიდობიან მოსახლეობას თავს არ ესხმიან, რაც ტყუილია — იბომბება დასახლებები, ბაღები, სკოლები, საავადმყოფოები. რუსეთმა უკრაინას სხვადასხვა ტერიტორიიდან შეუტია და ახლა საომარი მოქმედებები ქვეყნის არაერთ რეგიონსა და ქალაქში მიმდინარეობს, მათ შორის, კიევის ოლქთან. ორივე მხარეს არის დანაკარგები — დაიღუპა ასეულობით მშვიდობიანი მოქალაქე და სამხედრო პირი. რუსული ჯარები ცდილობენ, ხელში ჩაიგდონ მნიშვნელოვანი ობიექტები, უკრაინა მათ წინააღმდეგობას უწევს. სამხედრო მოქმედებებს თან ახლავს კიბერშეტევები, დეზინფორმაციისა და პროპაგანდის ტალღა.

ვოლოდიმირ ზელენსკიმ ქვეყანაში ჯერ სამხედრო მდგომარეობა, შემდეგ კი საყოველთაო მობილიზაცია გამოაცხადა და თქვა, რომ იარაღს მისცემენ ყველას, ვისაც ქვეყნის დაცვა ენდომება. ზელენსკიმ არაერთხელ მოუწოდა პარტნიორებს დახმარებისა და სერიოზული ნაბიჯების გადადგმისკენ და აღნიშნა, რომ ომი არამხოლოდ უკრაინაში, არამედ ევროპაშია.

ევროკავშირმა, აშშ-მ, დიდმა ბრიტანეთმა, კანადამ, იაპონიამ, ავსტრალიამ, სამხრეთ კორეამ, ტაივანმა, ახალმა ზელანდიამ, გერმანიამ რუსეთს სანქციები დაუწესეს, რომელიც მოიცავს ფინანსურ შეზღუდვებს ფიზიკურ და იურიდიულ პირებზე, რუსულ ელიტაზე, ოლიგარქებზე, მსხვილ ბანკებზე, ავიაკომპანიებზე. უკრაინა უფრო ეფექტიანი ნაბიჯების გადადგმას ითხოვს.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში