15 სექტემბერს რეგიონულმა მედიამ, "ქართლის ამბებმა", მშობლის მონათხრობზე დაყრდნობით, უცნობი კაცის მიერ ბავშვის სავარაუდო გატაცების მცდელობაზე ინფორმაცია გაავრცელა. შემთხვევა ახმეტის მუნიციპალიტეტის სოფელ ქვემო ალვანში მოხდა.

მშობლის განცხადებით, შემთხვევა გასულ კვირას მოხდა. 10 წლის ბავშვს, რომელიც ცეკვის რეპეტიციიდან ბრუნდებოდა და სამარშრუტო ტაქსს მარტო ელოდა, უცხო მამაკაცმა სახლში წაყვანა შესთავაზა, რაზეც ბავშვმა უარი განაცხადა. ამის შემდეგ კაცი მანქანიდან გადმოვიდა და ბავშვის ძალით წაყვანას შეეცადა. მოზარდმა უცნობს წინააღმდეგობა გაუწია და ახლომდებარე მაღაზიის მიმართულებით გაიქცა.

მომხდარზე გამოძიება დაიწყო. შინაგან საქმეთა სამინისტრომ NEWS.On.ge-ს განუცხადა, რომ საქმეზე გამოძიება სისხლის სამართლის კოდექსის 150-ე მუხლით, იძულების ფაქტზეა დაწყებული. უწყების ინფორმაციით, პირი იდენტიფიცირებულია და მიმდინარეობს შესაბამისი საგამოძიებო მოქმედებები.