ინფექციური საავადმყოფოს დირექტორეი, თენგიზ ცერცვაძე, კოვიდპასპორტთან დაკავშირებით საკოორდინაციო საბჭოს მიერ მიღებულ გადაწყვეტილებაზე ამბობს, რომ სავარაუდოდ, ვერ გამოიღო ის ეფექტი, რასაც ელოდნენ და ამიტომ გააუქმეს.

"მე არ ვარ საკოორდინაციო საბჭოს წევრი, არც ვაქცინაციის საბჭოს წევრი და მე არ მაქვს მონაცემები, თუ რა დადებითი ეფექტი ჰქონდა ამ კოვიდპასპორტებს. მე ვუშვებ ასეთ მიდგომას, სავარაუდოდ, ეს ასე იქნებოდა, რომ გარკვეულმა კომპეტენტურმა ადამიანებმა, თუ რა მოგვცა ამ მწვანე პასპორტმა, მოგვცა თუ არა ის ეფექტი, რასაც მისგან ელოდნენ. სავარაუდოდ, მან ის ეფექტი ვერ მოგვცა, რასაც ელოდნენ, რის გამოც მოხდა გაუქმება. ეს ჩემი ვარაუდია, რამეთუ მე არ ვიყავი არც გადაწყვეტილების მიმღები და არც რომელიმე ამ საბჭოს წერვი", — განაცხადა მან საზოგადოებრივი მაუწყებლის ეთერში.

საქართველოში მწვანე პასპორტი გაუქმდა. ამის შესახებ საკოორდინაციო საბჭოსთან არსებული ოპერაციული შტაბის უფროსმა, გიორგი ღიბრაძემ განაცხადა. მისი თქმით, მოქალაქეებს ქვეყანაში მწვანე პასპორტის წარდგენის ვალდებულება აღარ ექნებათ, მაგრამ ბაზა დარჩება იმისთვის, რომ მწვანე სტატუსი ქვეყნის გარეთ გამოიყენონ.

საქართველოში მწვანე პასპორტები პირველ დეკემბერს გამოჩნდა. ქვეყანაში 2 აპლიკაცია მუშაობდა მწვანე პასპორტის ასაღებად და შესაბამისად, ორი ტიპის მწვანე საშვი გვქონდა. ერთს ევროკავშირი აღიარებდა და ამ აპლიკაციით მწვანე პასპორტს ვერ იღებდნენ ისინი, ვინც კორონავირუსი 6 თვეზე მეტი ხნის წინ გადაიტანა. სწორედ ამიტომ შეიქმნა მეორე აპლიკაცია, სადაც იმ პირების კოდებიც ჩანდა, ვისაც კორონავირუსი დიდი ხნის წინ ჰქონდა გადატანილი.

ე.წ. უვადო მწვანე პასპორტი კორონაგადატანილებისთვის სამედიცინო სფეროს წარმომადგენლების მხრიდან კრიტიკის საგანი მაშინვე გახდა.