ამერიკის შეერთებული შტატების სახელმწიფო მდივანმა, ენტონი ბლინკენმა რუსეთის საგარეო საქმეთა მინისტრთან, სერგეი ლავროვთან სატელეფონო საუბრისას რუსეთს უკრაინის საზღვრებიდან ჯარების გაყვანისკენ მოუწოდა. ამის შესახებ განცხადებას სახელმწიფო დეპარტამენტი ავრცელებს.

"სახელმწიფო მდივანმა რუსეთს დაუყოვნებლივ დეესკალაციისა და უკრაინის საზღვრებიდან ჯარებისა და ტექნიკის გაყვანისკენ მოუწოდა. მან ხაზგასმით აღნიშნა, რომ უკრაინაში შემდეგ შეჭრას სწრაფი და მკაცრი შედეგები მოჰყვება და მოუწოდა რუსეთს, მიჰყვეს დიპლომატიის გზას", — ვკითხულობთ განცხადებაში.

ენტონი ბლინკენმა სატელეფონო საუბრის შესახებ ინფორმაცია Twitter-ზეც გაავრცელა და აღნიშნა, რომ ლავროვთან შემდგომი დისკუსიების გაგრძელებისთვის აშშ-ისა და პარტნიორების მზაობა დაადასტურა.

"დღეს საგარეო საქმეთა მინისტრთან, ლავროვთან საუბრისას ხაზგასმით აღვნიშნე აშშ-ის მზაობაზე, ჩვენ მოკავშირეებსა და პარტნიორებთან ერთად, რომ გავაგრძელოთ დისკუსია უსაფრთხოების ორმხრივ საკითხებზე. მზად ვართ თავიდან ავიცილოთ კონფლიქტი, რომელიც არავის ინტერესშია, თუმცა მზად ვართ უკრაინაში შეჭრის შემთხვევაში, რუსეთს მწვავე საფასური დავაკისროთ", — წერს ის.

უკრაინის საზღვრებთან სიტუაცია უფრო და უფრო იძაბება. 26 იანვარს რუსეთმა ბელარუსში სამხედრო ძალები განათავსა, რითიც უკრაინის ჩრდილოეთით შეიქმნა ახალი სავარაუდო ფრონტი თავდასხმისთვის. ამის ფონზე რუსეთი ამტკიცებს, რომ უკრაინაში შეჭრას არ გეგმავს, ამავდროულად კი დასავლეთი მკაცრი ეკონომიკური სანქციებით იმუქრება. ბოლო ინფორმაციით, რუსეთს უკრაინის საზღვრებთან 100 ათასამდე სამხედრო ჰყავს მობილიზებული.

გაიგე მეტი: