ინგლისსა და უელსში 1990 წელს დაბადებული ქალების 50.1%-მა 30 წელს შვილის გაჩენის გარეშე გადააბიჯა. ამის შესახებ კვლევის შედეგები სტატისტიკის ეროვნულმა ბიურომ წარადგინა. მონაცემების მიხედვით, აღნიშნული მაჩვენებელი რეკორდულია — 1971 წელს იმ ქალების რიცხვი, რომელმაც 30 წლამდე შვილი არ გააჩინეს, 18%-ს შეადგენდა.

ბოლო მონაცემებმა ისიც აჩვენა, რომ ოჯახებს საშუალოდ 2 შვილი ჰყავთ, აგრეთვე, უფრო და უფრო იზრდება ერთშვილიანი ოჯახებისა და იმ ქალების რიცხვი, რომლებიც შვილს საერთოდ არ აჩენენ.

"ვხედავთ, რომ ქალები შვილებს სულ უფრო გვიან აჩენენ. 1990 წელს დაბადებული ქალები პირველ თაობას მიეკუთვნებიან, რომელთა ნახევარიც 30 წლის იუბილეს შვილის გარეშე შეხვდა", — აცხადებენ სტატისტიკის ეროვნულ ბიუროში.

ექსპერტების თქმით, ქალების არჩევანი, რომ შვილები 30 წლის ასაკში ან უფრო გვიან იყოლიონ, რამდენიმე ფაქტორითაა განპირობებული, რომელთა შორისაცაა დასაქმებული ქალების რაოდენობის გაზრდა, შვილის აღზრდასთან დაკავშირებული ხარჯების გაზრდა და ა.შ.

"ბოლო რამდენიმე ათწლეულის განმავლობაში შეინიშნება ტენდენცია, რომლის მიხედვითაც ქალები შვილებს წინა თაობასთან შედარებით უფრო გვიან აჩენენ, უფრო ნაკლები შვილის ყოლა უნდათ ან შვილის ყოლა საერთოდ არ უნდათ. ეს სოციალური, პროფესიული და ფინანსური მიზეზებითაა განპირობებული. ის, თუ როდის იყოლიო შვილი, პირადი გადაწყვეტილებაა, რომელსაც ყველამ ისევე უნდა სცეს პატივი, როგორც შვილების არყოლის გადაწყვეტილებას", — ამბობს გინეკოლოგი ჯო მაუნტფილდი The Guardian-თან საუბრისას.

აღსანიშნავია, რომ მსოფლიოში სულ უფრო მეტი ადამიანი ამბობს შვილების გაჩენაზე უარს კლიმატური ცვლილებების გამო. მაგალითად, 2020 წლის ბოლოს გამოქვეყნებული იმ კვლევის შედეგები, რომელშიც 27-დან 45 წლამდე 600 ადამიანი იყო ჩართული, მიუთითებს, რომ მონაწილეთა 96 პროცენტი კლიმატის ცვლილებების სავალალო შედეგების გამო შვილის გაჩენაზე დარდობს, განსაკუთრებით მაშინ, როცა შეუქცევადი პროცესები უკვე დაწყებულია.

ამავე თემაზე: