ქართული ოცნებისა და დროას შემდეგ, უკრაინის მხარდამჭერი რეზოლუციის პროექტი ევროპელმა სოციალისტებმაც წარადგინეს. რუსეთი არც ამ ვერსიაშია ნახსენები.

გთავაზობთ რეზოლუციის ტექსტს სრულად.

"ჩვენ, ევროპელი სოციალისტები ღრმა წუხილს გამოვხატავთ უკრაინაში მიმდინარე სავარაუდო სამხედრო ესკალაციაზე. წინააღმდეგი ვართ ქმედებების, რომელიც ნებისმიერი სუვერენული სახელმწიფოს სუვერენიტეტისა და ტერიტორიული მთლიანობის წინააღმდეგ შეიძლება იყოს მიმართული. უკრაინაში სამხედრო ესკალაცია საფრთხეს შეუქმნის არა მხოლოდ რეგიონის, არამედ მსოფლიო მშვიდობასა და უსაფრთხოებას;

ვემხრობით საერთაშორისო სამართლის პრინციპებზე დაფუძნებულ საერთაშორისო წესრიგისა და საერთაშორისო საზოგადოების საყოველთაოდ აღიარებულ ნორმებს, მათ შორის საზღვრების ურღვეობის, ტერიტორიული მთლიანობის და სახელმწიფოს სუვერენიტეტის პრინციპებს. ასევე, სახელმწიფოს სუვერენულ უფლებას გაწევრიანდეს ნებისმიერ საერთაშორისო, პოლიტიკურ, ეკონომიკურ, თუ სამხედრო ორგანიზაციაში.

მომხრეები ვართ საერთაშორისო ურთიერთობებში მშვიდობისა და თანამშრომლობის პრინციპების აღიარებისა და დამკვიდრების; ამიტომ, მოვუწოდებთ კონფლიქტში პირდაპირ თუ ირიბად ჩართულ მხარეებს თავშეკავებისკენ; მიგვაჩნია, რომ უკრაინაში სამხედრო ესკალაციის არდაშვება უნდა იყოს საერთაშორისო თანამეგობრობის უმთავრესი საზრუნავი, რაც "მინსკის ხელშეკრულებით" და "ნორმანდიული ფორმატის" გადაწყვეტილებების შესრულებით იქნება შესაძლებელი;

ყოველივე ზემო აღნიშნულის გათვალისწინებით და საქართველოს სახელმწიფო ინტერესებიდან გამომდინარე, მივმართავთ საქართველოს მთავრობას, გამოიყენოს ყველა დიპლომატიური ინსტრუმენტი და მაქსიმალურად ჩაერთოს უკრაინაში სამხედრო ესკალაციის მშვიდობიანად განმუხტვის საქმეში".

შეგახსენებთ, რომ გუშინ, 26 იანვარს, ქართულმა ოცნებამ დააინიცირა რეზოლუციის ტექსტი, რომელშიც რუსეთი და მის მიერ როგორც უკრაინის, ისე საქართველოს წინააღმდეგ მიმართული აგრესია ნახსენები არ არის. სწორედ ამ მიზეზით, ერთობლივი განხილვების მიუხედავად, საპარლამენტო ოპოზიციამ მას ხელი არ მოაწერა. დღეს, პარტია დროამ რეზოლუციის ტექსტის ალტერნატიული ვერსია შეიმუშავა და ოპოზიციურ პარტიებს ხელმომწერებად მიიწვია. გარდა ამისა, იდენტური ტექსტით მათ პეტიციაც შექმნეს და რეზოლუციაზე ხელმოწერა პარტიების გარდა მოქალაქეებს, ინდივიდუალურადაც შეუძლიათ.

აღსანიშნავია, რომ უკრაინელი ხალხისა და კიევის საქალაქო საბჭოს მხარდამჭერი განცხადება დღეს თბილისის საკრებულომაც გაავრცელა. რუსეთის აგრესია არც ამ მიმართვაშია ნახსენები.