ქართული ოცნება დღეს დააინიცირებს უკრაინის მხარდამჭერ რეზოლუციას, რომელშიც რუსეთი ნახსენები არ არის. მმართველი პარტიის ფრაქციის თავმჯდომარე, მამუკა მდინარაძის მტკიცებით, "მცდელობა არ დაუკლიათ", რომ რეზოლუციის ტექსტის შემუშავებისას სხვა ფრაქციების და პოლიტიკური ჯგუფების მოსაზრებებიც გაეთვალისწინებინათ, თუმცა შეთანხმება მაინც ვერ მოხერხდა.

უკრაინაში შესაძლო სამხედრო ესკალაციის შესახებ რეზოლუციის ტექსტი ასეთია:

"საქართველოს პარლამენტი გამოხატავს ღრმა შეშფოთებას უკრაინაში შესაძლო სამხედრო ესკალაციის გამო და გმობს ყოველგვარ განზრახვას, რომელიც სუვერენული სახელმწიფოს სუვერენიტეტის და ტერიტორიული მთლიანობის წინააღმდეგ შეიძლება იყოს მიმართული, რაც ახალ საფრთხეს უქმნის არამხოლოდ უკრაინის, არამედ რეგიონულ მშვიდობას და უსაფრთხოებას;

აცხადებს, რომ ჩრდილოატლანტიკურ ალიანსში გაწევრიანება არის სახელმწიფოს სუვერენული უფლება და სამხედრო-პოლიტიკური არგუმენტებით ამ უფლების შეზღუდვის ყოველგვარი მცდელობა კატეგორიულად მიუღებელია; მიიჩნევს, რომ უკრაინაში ომის არდაშვება უნდა იყოს საერთაშორისო თანამეგობრობის უმთავრესი საზრუნავი. სოლიდარობას უცხადებს მეგობარ უკრაინელ ხალხს, რომელსაც ყოველგვარი სამხედრო ესკალაციით მძიმე ზიანი შეიძლება მიადგეს.

ყოველივე ზემოთ აღნიშნულის გათვალისწინებით, საქართველოს მთავრობას დიპლომატიური ინსტრუმენტების გამოყენებით და სტრატეგიულ პარტნიორებთან მჭიდრო კოორდინაციით განაგრძოს თავისი წვლილის შეტანა უკრაინაში ომის არდაშვებაში".

უკრაინის მხარდამჭერი რეზოლუციის შემუშავების ინიციატივა ოპოზიციური ფრაქციების ლიდერებს ეკუთვნით. 24 იანვარს გამართულ ბრიფინგზე მათ მმართველ პარტიას შესთავაზეს ერთიანი ტექსტის შემუშავება. დღეს დილიდან დეპუტატები რეზოლუციასთან დაკავშირებით კონსულტაციებს მართავდნენ, თუმცა შეთანხმება ვერ მოახერხეს.

რეფორმების ფრაქციის წევრის, ხათუნა სამნიძის ინფორმაციით, ქართულმა ოცნებამ მათ რეზოლუციის ტექსტის საკუთარი ვერსია შესთავაზა, განხილვის შემდეგ ისინი პრინციპულ საკითხებზე შეთანხმდნენ. სამნიძის თქმით, შესვენების დროს ქართული ოცნების დეპუტატებმა გადაწყვიტეს რეზოლუციის ტექსტის თავდაპირველი ვერსია დაებრუნებინათ, რის გამოც ოპოზიციამ ტექსტის თანაავტორობაზე უარი თქვა.

ფრაქცია ნაციონალური მოძრაობის წევრის, ხატია დეკანოიძის თქმით, მიზეზი, რის გამოც ოპოზიცია მმართველი პარტიის შემუშავებული რეზოლუციის ტექსტის ხელმოწერაზე უარს ამბობს არის ის, რომ მასში რუსეთის სამხედრო აგრესია ნახსენები არ არის.

"გავაგრძელებთ მსჯელობას, არ არის გამორიცხული, რომ ოპოზიციამ ალტერნატიული რეზოლუციის პროექტი დააინიციროს, მაგრამ ამაზე მთლიანი ოპოზიციის პოზიციაა გასათვალისწინებელი", — ამბობს დეკანოიძე.

მამუკა მდინარაძე აცხადებს, რომ რეზოლუციის მათი ვერსიის "ყველა სიტყვა, ყველა ფრაზა გამომდინარეობს საქართველოს ეროვნული ინტერესებიდან" და დაცლილია პოპულისტური თუ პროვოკაციული რიტორიკისგან.

უკრაინის მხარდამჭერი რეზოლუციის გარდა საპარლამენტო ოპოზიცია ითხოვს პარლამენტმა შეიმუშავოს რეზოლუცია საქართველოს NATO-ში გაწევრიანების შესახებ. ოპოზიციამ, ასევე, მოითხოვა საგარეო საქმეთა და თავდაცვისა და უშიშროების კომიტეტების ფარგლებში საგარეო საქმეთა მინისტრის, დავით ზალკალიანისა და თავდაცვის მინისტრის, ჯუანშერ ბურჭულაძის მოწვევას რეგიონში შექმნილი უსაფრთხოების გამოწვევების განსახილველად.

გარდა ამისა, საპარლამენტო ოპოზიცია პრემიერმინისტრ ირაკლი ღარიბაშვილს მოუწოდებს, მიმდინარე კვირას მოიწვიოს უშიშროების საბჭოს გაფართოებული სხდომა, სადაც განიხილავენ შავი ზღვის რეგიონში არსებულ ახალ გამოწვევებს.