ოცნების პრემიერი ირაკლი კობახიძე 11-12 ივნისს უნგრეთს ეწვევა. მთავრობის ადმინისტრაციის ცნობით, კობახიძე უნგრეთის პრემიერმინისტრს, ვიქტორ ორბანს შეხვდება.

ოცნების ხელისუფლების მთავრობის ადმინისტრაციის ცნობით, 11 ივნისს უნგრეთის პრემიერმინისტრის სასახლეში ოცნების პრემიერის დახვედრის ოფიციალური ცერემონია გაიმართება. ირაკლი კობახიძეს ვიქტორ ორბანი პირისპირ შეხვედრაზე უმასპინძლებს.

ოფიციალური ვიზიტის ფარგლებში ბუდაპეშტში საქართველო-უნგრეთის მთავრობათაშორისი კომისიის მეორე სხდომა გაიმართება. გაფორმდება შეთანხმებები სოფლის მეურნეობის, ენერგეტიკის, კულტურისა და ინოვაციების, ასევე სპორტის სფეროში ურთიერთთანამშრომლობის შესახებ.

მთავრობათაშორისი კომისიის სხდომის შემდეგ დაგეგმილია ირაკლი კობახიძის და ვიქტორ ორბანის ერთობლივი პრესკონფერენცია.

უნგრეთში ოფიციალური ვიზიტის ფარგლებში ირაკლი კობახიძე შეხვედრებს გამართავს უნგრეთის პრეზიდენტ ტამაშ შუიოკთან და უნგრეთის ეროვნული ასამბლეის სპიკერ ლასლო კოვერთან.

ცნობისთვის, ოცნების პრემიერი საპარლამენტო არჩევნების შემდეგ ორბანს მეშვიდედ ხვდება.

წინა შეხვედრების ქრონოლოგია ასეთია:

2024 წლის 29 ოქტომბერს თბილისში;
2024 წლის 7 ნოემბერს ბუდაპეშტში;
2025 წლის 13 თებერვალს დუბაიში;
2025 წლის 12 აპრილს ანტალიაში;
2025 წლის 16 მაისს ტირანაში;
2025 წლის 28 მაისს ბუდაპეშტში.