ოცნების პარლამენტის თავმჯდომარემ, შალვა პაპუაშვილმა სასამართლო დარბაზებში ბოლო დროს მიმდინარე პროცესებზე კომენტარი გააკეთა. მისი თქმით, ექსტრემისტებს ქართული მართლმსაჯულების კედლებში სიტუაციის არევის საშუალება არ ექნებათ.

"ჩვენ რასაც ვხედავთ ლამის ყოველდღიურად სასამართლოში, ეს არის ისტერია, ძალადობა. გუშინ ვიხილეთ კადრები, როდესაც მანდატურზე პირდაპირ ძალადობდა ერთ-ერთი ქალი აქტივისტი. ამ ყველაფერს არანაირად არ ესაქმება სასამართლოს დარბაზებსა და დერეფნებში. ამიტომ, იმედი მაქვს, რომ, მათ შორის, სასამართლო, მანდატურის სამსახური ამ მხრივ იქნება მკაცრი. შეუძლებელია, ჩვენ მივცეთ შესაძლებლობა ექსტრემისტებს, რომ არიონ ქართული მართლმსაჯულების კედლებში სიტუაცია. სამწუხაროდ, ეს ექსტრემიზმი და ისტერია დაფინანსებული და წახალისებულია გარედან, რადგან სხვა დროს ხმამაღლა მოსაუბრე ზოგიერთი ევროპელი ელჩი გაჩუმებულია. ამით ახალისებენ ზუსტად ამ ქცევას, მანდატურზე ძალადობას, სასამართლო დარბაზებში ისტერიას და სხვა ასეთ ექსტრემისტულ ქცევებს. ვფიქრობ, მნიშვნელოვანია, რომ მოხდეს ამ სიტუაციის მოწესრიგება"— განაცხადა შალვა პაპუაშვილმა.

ცნობისთვის, ამავე თემაზე გააკეთა განცხადება საზოგადოებრივმა მოძრაობა ერთიანმა ნეიტრალურმა საქართველომ. მათი თქმით, სასამართლოში ქცევის წესები სისტემატურად ირღვევა და ამ ყველაფერს ევროკავშირის ზოგიერთი ელჩი ახალისებს. ერთიანმა ნეიტრალურმა საქართველომ მსგავსი ფაქტების აღკვეთის თაობაზე ხელისუფლებას მიმართა.