მარნეულისა და ჰუჯაბის ეპარქიამ გამოაქვეყნა საეპისკოპოსო სასამართლოს ოქმი, სადაც აღნიშნულია, რომ მარნეულისა და ჰუჯაბის ეპარქიის წინამძღოლის, გიორგი ჯამდელიანის მკვლელობის მცდელობაში ბრალდებული გ.შ. დამნაშავედაა ცნობილი.

აღნიშნული ინიციალები ემთხვევა მედიაში გავრცელებულ ინფორმაციას იმის შესახებ, რომ მარნეულისა და ჰუჯაბის ეპისკოპოსი გიორგი მისი მოწამვლის მცდელობაზე საუბრისას გულისხმობდა ქვემო ქართლის სახელმწიფო რწმუნებულის ყოფილ მოადგილეს, გიორგი შინჯიკაშვილს.

საეპისკოპოსო სასამართლოს ოქმის მიხედვით, ბრალმდებელი და მომჩივანი მონაზონი თ.კ.-ა, ბრალდებული — "საერო პირი, მარნეულისა და ჰუჯაბის ეპარქიის საზღვრებში მოქმედი ბატონი გ.შ."

საეპისკოპოსო სასამართლოს განჩინებით, "ბრალდებულ ბატონ გ.შ-ს გულწრფელ სინანულამდე აეკრძალა ზიარება", ხოლო სინანულის შემთხვევაში 20 წლით უზიარებლობის განაჩენი გამოუტანეს.

საეპისკოპოსო სასამართლოს ოქმი 6 ივნისითაა დათარიღებული და მას ხელს მარნეულისა და ჰუჯაბის ეპისკოპოსი გიორგი (ჯამდელიანი) აწერს.

საქმე ეხება 8 ივნისს ეპისკოპოსის ქადაგებას. მისი თქმით, მთავრობის მოქმედ წევრს, კონკრეტულად უშიშროების უწყების წარმომადგენელს, მონაზონი ჰყავდა "დავერბოვკრებული" და მისი მეშვეობით წამლავდა.

ამის შემდეგ, პროკურატურამ გააკეთა განცხადება, სადაც ნათქვამია, რომ ეპისკოპოსის ქადაგების საფუძველზე გამოძიება სისხლის სამართლის კოდექსის 18,108-ე მუხლით (განზრახ მკვლელობის მომზადება) დაიწყო.

9 ივნისს ეპისკოპოსმა გიორგი ჯამდელიანმა ტვ პირველთან საუბრისასა განაცხადა, რომ არც ჩვენებას მისცემდა და არც პროკურატურასთან აპირებდა თანამშრომლობას.

"მე დამიკავშირდა პროკურატურა, მაგრამ მე პირადად ჩემს კონსტიტუციით მონიჭებულ უფლებას, როგორც სასულიერო პირი, ამ ეტაპზე ასე ვთვლი, არ ვიძლევი ჩვენებას და არ ვაპირებ თანამშრომლობას არც პროკურატურასთან და არც პოლიციასთან. მე ვამბობ უარს. ვმოქმედებ საეკლესიო კანონიკის ნორმების ფარგლებში. მონაზონი ჩემთან არ იმყოფება", — განაცხადა ეპისკოპოსმა.