სანამ ზოგი იმას შიშობს, ხელოვნურმა ინტელექტმა არ ჩაგვანაცვლოს, შრომის ბაზარს ცუგები იპყრობენ! უთუოდ გემახსოვრებათ, როგორ დასაქმდა ჰიუნდაიში ძაღლი, რომელიც მათ ოფისს ხშირად სტუმრობდა ან როგორ დაიწყო კიდევ ერთმა ბეწვის გორგალმა ამერიკულ საავადმყოფოში პაციენტების მიმსალმებლად მუშაობა.

თუმცა, ალბათ ჯერ არცერთ ცუგას არ ჰქონია ისეთი საპასუხისმგებლო თანამდებობა, როგორიც დენვერს — ოქროსფერ რეტრივერს, რომელიც ცოტა ხნის წინ ინდური სტარტაპის ახალი თანამშრომელი გახდა.

ქალაქ ჰაიდარაბადში მდებარე ინოვაციურმა ტექკომპანიამ Harvesting Robotics ცუგა ბედნიერების გენერალურ დირექტორად (CHO) დანიშნა. ინფორმაცია კი ამის შესახებ თავად სტარტაპის დამფუძნებელმა რაჰულ არეპაკამ გაავრცელა — არც მეტი, არც ნაკლები, LinkedIn-ზე.

"გაიცანით ჩვენი ახალი თანამშრომელი, დენვერი — ბედნიერების გენერალური დირექტორი", — წერს არეპაკა, — "ის არც კოდს არ წერს და, ზოგადად, არც არაფერი აღელვებს, უბრალოდ, სამსახურში მოდის, ყველას თავს აყვარებს და ენერგიით ავსებს. თან, უკვე ოფიციალურად ცხოველებისადმი მეგობრული ოფისი გავხდით. საუკეთესო გადაწყვეტილებაა. ჰო, მართლა, დენვერი კომპანიაში ყველანაირი პრივილეგიით სარგებლობს".

თანამშრომლების ემოციური მხარდაჭერისა და ამ მისიაში ცუგების და ფისოების მონაწილეობის მნიშვნელობას უკვე არაერთი დიდი კომპანია აღიარებს. ისეთ გიგანტებს, როგორებიც გუგლი და ამაზონია, საგანგებოდ ცხოველებისთვის განკუთვნილი სივრცეებიც კი აქვთ გამოყოფილი.

კვლევები მოწმობს, რომ ცხოველები თანამშრომლებში სტრესს ამცირებენ, აუმჯობესებენ ურთიერთობებს და პროდუქტიულობასაც კი ზრდიან. ადამიანისა და ცხოველის კავშირის კვლევითი ინსტიტუტის (HABRI) მონაცემებით, ცხოველებისადმი მეგობრული გარემოს მქონე სამსახურებში თანამშრომლების 91 პროცენტი უფრო მეტად გრძნობს კომპანიის ნაწილად თავს, 87 პროცენტი კი ამავე კომპანიაში დარჩენას განიხილავს. ამდენად, ცხოველებისადმი მეგობრული სივრცის შექმნა ეფექტურ HR სტრატეგიადაც შეიძლება ჩაითვალოს.