გიორგი ბაჩიაშვილის გატაცებაში სპეცსამსახურებთან ერთად კომპანია "ჯორჯიან ეარვეისის" ჩართულობაც იკვეთება — ამ თემაზე საერთაშორისო გამჭვირვალობა საქართველო (IT) ვრცელ სტატიას აქვეყნებს.

მათი, ცნობით, გიორგი ბაჩიაშვილის გატაცების საქმეში, ახალი დეტალები მიანიშნებს, რომ სპეცოპერაციაში, საქართველოს უსაფრთხოების სამსახურებთან ერთად, სავარაუდოდ, კომპანია "ჯორჯიან ეარვეისიც" მონაწილეობდა.

სახელმწიფო უსაფრთხოების სამსახურმა 27 მაისს ბაჩიაშვილის დაკავების შესახებ განაცხადა და მიანიშნა, თითქოს ის საქართველოს, სომხეთსა და აზერბაიჯანს შორის ე.წ."მწვანე ზონაში" გადაადგილდებოდა. თუმცა, თავად ბაჩიაშვილი უარყოფს ამ ვერსიას და აცხადებს, რომ 24 მაისს უცხო ქვეყნის ტერიტორიაზე გაიტაცეს და საქართველოში VIP ბორტით ჩამოიყვანეს.

მისი თქმით, გატაცება წინასწარ დაგეგმილი სპეცოპერაცია იყო, რომელშიც მონაწილეობდა უცხო ქვეყნის სპეცსამსახურები, ხოლო საქართველოში "ჯორჯიან ეარვეისის" საკუთრებაში არსებული Bombardier-ის ტიპის თვითმფრინავით ჩამოიყვანეს. ბაჩიაშვილი ამტკიცებს, რომ თვალებახვეული, იძულებით ჩასვეს ამ ბორტში და ასე ჩამოიყვანეს საქართველოში.

სატელიტური მონაცემებით დადასტურებული ინფორმაცია ამ ვერსიას აძლიერებს. bm.ge-ის ცნობით, 26 მაისს აბუ-დაბიში დაეშვა და მალევე აფრინდა "ჯორჯიან ეარვეისის" VIP ბორტი (რეისის ნომერი: 4L-TGB), რომელსაც ფრენისას სანავიგაციო გადამცემი გამორთული ჰქონდა. გამგზავრებისა და დანიშნულების შესახებ ინფორმაცია არასრულად აისახა საჯარო რეისების ბაზაში, რაც აჩენს ეჭვს, რომ ბორტი სპეციალურად იყო გამოყენებული დისკრეტული გადაყვანის მიზნით.

კომპანია ოფიციალურად მონაწილეობას უარყოფს, თუმცა მის წარსულ საქმიანობას, მმართველ პარტიასთან და რუსეთთან კავშირებს ბევრი ექსპერტი საეჭვოდ მიიჩნევს. აღსანიშნავია, რომ უკრაინამ 2023 წელს სანქციები დაუწესა როგორც კომპანიას, ასევე მის დამფუძნებლებს – თამაზ და დავით გაიაშვილებს – რუსეთთან თანამშრომლობის გამო.

გარდა ამისა, 2022 წელს საქართველოს მთავრობამ კომპანიას რამდენიმე ათეული მილიონი ლარის დავალიანება აპატია. ფინანსური ანგარიშგების წესების უგულებელყოფისთვის კი "ჯორჯიან ეარვეისი" არაერთხელ იქნა დაჯარიმებული SARAS-ის მიერ.

სრულად სტატია ნახეთ აქ.

მეტი გიორგი ბაჩიაშვილის საქმეზე: