საქართველოს საგარეო საქმეთა მინისტრი დავით ზალკალიანი უკრაინის მხარდამჭერ კამპანიას, #StandWithUkraine-ს შეუერთდა. მან ჯერ ტვიტერზე დაწერა, რომ საქართველო სოლიდარულია უკრაინის მიმართ, შემდეგ კი ამის სქრინი ფეისუბქზე გამოაქვეყნა.

"ნებისმიერი ქვეყნის სუვერენიტეტისა და ტერიტორიული მთლიანობის საფრთხის წინაშე დაყენება სრულიად მიუღებელია. საქართველო სოლიდარულია უკრაინისა და უკრაინელი ხალხის მიმართ. ჩვენ ვდგავართ უკრაინის გვერდით", — წერს ის და უკრაინის საგარეო საქმეთა სამინისტროს პოსტს აზიარებს.

აქტივისტებმა არაერთხელ გააკრიტიკეს მთავრობა უკრაინის მიმართ რუსეთისგან მზარდ საფრთხეზე პასიური პოზიციის გამო.

დღეს, 23 იანვარს უკრაინის საელჩოსთან მხარდამჭერი აქცია გაიმართა. ორგანიზატორების განცხადებით, გულდასაწყვეტია, რომ ვერ ხედავენ ოფიციალური თბილისისგან უკრაინელი ხალხისადმი გამოხატულ ხელშესახებ მხარდაჭერას.