ნაციონალური მოძრაობის წევრმა, ლევან ხაბეიშვილმა ექსპრეზიდენტ მიხეილ სააკაშვილთან შეხვედრის შემდეგ განაცხადა, რომ მათ ქვეყანაში სახალხო გამოსვლების მნიშვნელობაზე ისაუბრეს. მისივე თქმით, სასაუბრო თემა პენსიის გაზრდას, საწვავის ფასის შემცირებას, მინიმალური ხელფასის მომატებასა და ახალგაზრდების სწავლასაც შეეხო.

"ძალიან მცირე ხანი ვისაუბრეთ იმაზე, რომ აი, ამ გაჭირვებას, კომუნალური გადასახადების გაძვირებას, ტრანსპორტის გაძვირებას, საწვავის, პროდუქტების, მედიკამენტების გაძვირებას, აუცილებლად მოჰყვება კონკრეტული რეაგირება ოპოზიციისგანაც და ხალხისგანაც და მნიშვნელოვანია, სახალხო გამოსვლები ქვეყნის მასშტაბით, მარტივი რამის გამო, იმიტომ, რომ ჩვენ ამ უსამართლობას არ და ვერ უნდა შევეგუოთ", — განაცხადა მან.

გუშინ, 11 იანვარს სააკაშვილმა ფეისბუქგვერდზე დაწერა, რომ ნაციონალური მოძრაობის განცხადებას, რეგიონებში გასვლასა და საერთო ეროვნულ მობილიზაციაზე ეთანხმება. მისი განცხადებით, მათი მიზანი "შეკრება და არდაშლა" უნდა იყოს, მანამ, სანამ რიგგარეშე არჩევნები არ დაინიშნება და ის "ტყვეობიდან გარეთ გასვლას" ვერ შეძლებს.