გამოცემა Bloomerg-ის ცნობით, ევროკავშირის დიდი ქვეყნები რუსეთისთვის სანქციების სწრაფად დაწესებაზე წინააღმდეგობას გამოთქვამენ. მედიის თანახმად, გერმანია, საფრანგეთი, იტალია და ესპანეთი მიიჩნევენ, რომ საჭიროა მოსკოვთან ლაპარაკი, მანამ, სანამ მასთან სერიოზულ ეკონომიკურ სანქციებზე დაიწყებენ საუბარს.

სტატიაში ვკითხულობთ, რომ აღმოსავლეთ ევროპის, ნიდერლანდებისა და სკანდინავიის წარმომადგენლებმა ევროპის კომისიას სთხოვეს, რომ რაც შეიძლება სწრაფად განიხილონ სანქციების შესახებ სავარაუდო დოკუმენტი. თუმცა მედიას წყარო ეუბნება, რომ ამას არ იზიარებს გერმანია. მათ მიაჩნიათ, რომ სანქციების სხვადასხვა ვარიანტის განხილვაზე მეტად, პუტინის შემდგომ ნაბიჯებზე დალოდება უფრო ეფექტური იქნება. ისინი ხაზს უსვამენ, რომ შეჭრის შემთხვევაში, ზომები სერიოზული იქნება, თუმცა მსჯელობა მიდის იმაზე, წინასწარ რამდენად დეტალურად უნდა დაგეგმონ, მაშინ, როცა გაურკვეველია პუტინის რეალური ზრახვები.

როგორც მედია ანონიმურ წყაროებზე დაყრდნობით წერს, სხვა სახელმწიფოების პოზიციაა, რომ სანქციებზე საჯარო მხარდაჭერის გამოხატვა რუსეთის პრეზიდენტს, ვლადიმერ პუტინს უკეთ შეაკავებს.

აშშ-მ და მოკავშირე ოფიციალურმა პირებმა განგაში ჯერ გასულ თვეს ატეხეს. ამერიკული დაზვერვის წარმომადგენლებმაც მოკავშირეები გააფრთხილეს, რომ ცოტა დრო დარჩა, რათა რუსეთს უკრაინაში სამხედრო მოქმედებების განხორციელებაში ხელი შეუშალონ. აშშ-მ ევროპულ ქვეყნებს მოუწოდა შეერთებულ შტატებთან იმუშაონ, რათა მოსკოვის შეკავების მიზნით ეკონომიკური და სამხედრო ზომების პაკეტი შეიმუშაონ.

უკრაინის თავდაცვის სამინისტრომ ნოემბრის დასაწყისში განაცხადა, რომ მის საზღვართან დაახლოებით, 90 000 რუსი ჯარისკაცი გადაისროლეს. გაურკვეველი იყო, რამდენი მათგანი იყო ადგილზე ახლად განლაგებული.