XI მოწვევის პარლამენტის პირველი სხდომა გაიხსნა. სხდომას უხუცესი წევრი ლადო კახაძე უძღვება.

ქართული ოცნების საპატიო თავმჯდომარე და სიის პირველი ნომერი ბიძინა ივანიშვილი XI მოწვევის პარლამენტის პირველ სხდომას ესწრება.

ბიძინა ივანიშვილი

ბიძინა ივანიშვილი

დარბაზში მხოლოდ პარტია ქართული ოცნების წევრები იმყოფებიან. რეგისტრაცია პარლამენტის 88 წევრმა გაიარა.

"როგორც მოგეხსენებათ, პარლამენტის პირველ სხდომას არ ესწრება საქართველოს პრეზიდენტი. აქედან გამომდინარე, საქართველოს პარლამენტის რეგლამენტის 85-ე მუხლის მეორე პუნქტის შესაბამისად, მე, როგორც სხდომაზე დამსწრე პარლამენტის უხუცესი წევრი, მე-11 მოწვევის პარლამენტის პირველ სხდომას გახსნილად ვაცხადებ. პარლამენტის აპარატიდან მოწოდებული ინფორმაციის საფუძველზე გაცნობებთ, რომ მე-11 მოწვევის პარლამენტის პირველი სხდომისთვის რეგისტრაცია გაიარა საქართველოს პარლამენტის 89 წევრმა. სხდომა უფლებამოსილია შეუდგეს მუშაობას", — განაცხადა საპარლამენტო უმრავლესობის წევრმა ლადო კახაძემ.

XI მოწვევის პარლამენტის პირველ სხდომას ასევე ესწრებიან: სახალხო დამცველი ლევან იოსელიანი, სახელმწიფო ორგანოების ხელმძღვანელები და საპატრიარქოს წარმომადგენლები.

პარლამენტის პირველი სხდომის დაწყებამდე ლადო კახამ ჟურნალისტებთან განაცხადა, რომ პრეზიდენტის სარჩელი და განცხადებები პარლამენტის სხდომის არალეგიტიმურობასთან დაკავშირებით არ უშლის ხელს იმას, რომ პარლამენტმა მუშაობა დაიწყოს.

"გასაჩივრება სხდომის წარმოებას ხელს არ უშლის. 5-ჯერ აღარ შემეკითხოთ, მე რახან ერთხელ გითხარით, ამას არ გადავთქვამ და ეს ეფუძნება კონსტიტუციონალისტების ნააზრევს", — განაცხადა ლადო კახაძემ.