პაპუაშვილის თქმით, პარლამენტში უსაფრთხოების ყვითელი დონე იმიტომ აამოქმედეს, რომ მოწესრიგებულად ჩატარდეს სხდომა.

"ეს ზომები არის იმისთვის, რომ მოწესრიგებულად ჩატარდეს სხდომა, მათ შორის მედიასაც ჰქონდეს შესაძლებლობა, რომ იმუშაოთ შეფერხების გარეშე.

2020 წლის პირველი სხდომა გახსოვთ ალბათ, ვინც აქ იყავით, მაშინ ამერიკის ელჩი კინაღამ მიაჭყლიტეს ჟურნალისტებმა კედელთან. ასე რომ, ვფიქრობ, კარგი ფორმატი არის იმისთვის, რომ გვქონდეს სამუშაო გარემო", — განაცხადა პაპუაშვილმა.

შეგახსენებთ, რომ დღეს პარლამენტში შესვლა შეუზღუდეს ონლაინმედიის წარმომადგენლებს. პარლამენტის მიერ გავრცელებულ ინფორმაციაში წერია, რომ "დაგეგმილ საპარლამენტო ღონისძიებებზე (მათ შორის კომიტეტის და პლენარულ სხდომებზე) დაიშვებიან მხოლოდ შესაბამისი სტრუქტურული ერთეულების მიერ მოწვეული პირები. შენობაში დაიშვებიან ტელემაუწყებლების/ტელემედია საშუალებების აკრედიტებული არაუმეტეს ორი ჯგუფი თითო მაუწყებლიდან, საპარლამენტო ღონისძიებების დასრულებამდე", — ნათქვამია განცხადებაში.