დღეს, პარლამენტთან მიმდინარე აქციის გასაშუქებლად მოსულ NEWS.On.ge-ს ჟურნალისტს თბილსერვისჯგუფის ფორმიანი პირი თავს დაესხა და ფიზიკური და სიტყვიერი შეურაცხყოფა მიაყენა. უცნობი პირის აგრესიის მიზეზი ის გახდა, რომ ჟურნალისტმა ქაშვეთიდან გამოსულ სასულიერო პირს ვიდეო გადაუღო, სადაც ის აქციის მონაწილეებს ეკამათება და ეუბნება, რომ "არჩევნები არ გაყალბებულა" და სახლში წავიდნენ.

ჟურნალისტის მოთხოვნის მიუხედავად, უცნობმა პირმა ვინაობა არ გაამხილა.

საპარლამენტო არჩევნების შედეგების გასაპროტესტებლად მოწყობილ აქციებზე ჟურნალისტებისთვის სამსახურებრივი მოვალეობის ხელშეშლის რამდენიმე ფაქტი გამოვლინდა. 19 ნოემბერს, თსუ-ს პირველ კორპუსთან გამართული აქციის შემდეგ დააკავეს მთავარი არხის ჟურნალისტი სერგი ბარამიძე, რომელიც მალევე გაათავისუფლეს. იმავე დღეს პოლიციამ ფიზიკურად იძალადა ასევე პუბლიკას ჟურნალისტ მინდია გაბაძეზე.

ცნობისათვის, დღეს, 25 ნოემბერს, პარლამენტში მე-11 მოწვევის სხდომა საპროტესტო აქციის ფონზე ჩატარდა. მოქალაქეები 26 ოქტომბრის არჩევნების შედეგებს აპროტესტებენ და ამტკიცებენ, რომ ხელისუფლებამ მათი ხმები გააყალბა.