აშშ-ს ახლად არჩეული პრეზიდენტის, დონალდ ტრამპის ეროვნული უსაფრთხოების საკითხებში მომავალმა მრჩეველმა, მაიკ უოლცმა რუსეთ-უკრაინის ომზე განაცხადა, რომ უნდა შეწყდეს კონფლიქტი და ამისთვის შესაბამისი ნაბიჯები გადაიდგმება.

უოლცმა აღნიშნა, რომ ომი ნამდვილი ადამიანთა ხორცსაკეპია.

"ამ ფრონტზე ეს უბრალოდ არის ადამიანთა და ტექნიკის აბსოლუტური ხორცსაკეპი. ეს უფრო პირველი მსოფლიო ომის სანგრების ომს ჰგავს", — თქვა უოლცმა.

ამასთან, მან ბაიდენის ადმინისტრაციის მიერ უკრაინის ქვეითთან საწინააღმდეგო ნაღმების გადაცემაზეც გააკეთა კომენტარი და დასძინა, რომ "ჭკვიანი ნაღმების მიწოდება ამ კონფლიქტის დასრულებისთვის უფრო ფართო სტრატეგიის ნაწილი უნდა იყოს".

უოლცის თქმით, აშშ-ის ახლად არჩეული პრეზიდენტი მიმდინარე კონფლიქტით არის "უაღრესად აღშფოთებული". ჟურნალისტის კითხვას თუ რატომ არ საუბრობს ტრამპი უკრაინაში შექმნილ ვითარებაზე, უოლცმა უპასუხა, რომ იგი ძალიან შეშფოთებულია კონფლიქტის ესკალაციით და სამომავლო სცენარის განვითარებით.

"პრეზიდენტი ტრამპი წარმოუდგენლად შეშფოთებულია იმ მსხვერპლით, რაც იქ ხდება, და კვლავ, იმით თუ როგორ აღვადგინოთ შეკავების მექანიზმი და როგორ დავამყაროთ მშვიდობა? [...] ჩვენ გვჭირდება, რომ ეს [ომი] პასუხისმგებლობიან დასასრულამდე მივიყვანოთ. ჩვენ გვჭირდება, რომ აღვადგინოთ შეკავების პოლიტიკა, აღვადგინოთ მშვიდობა და წინ გავუსწროთ ესკალაციის კიბეს, მასზე პასუხის გაცემის მაგივრად", — თქვა უოლცმა ინტერვიუში.

მანვე დასძინა, რომ "ევროპელებს მნიშვნელოვანი როლი ექნებათ" მშვიდობის დამყარებაში და მნიშვნელოვანი ასევე აშშ-ის ენერგოპოლიტიკაც იქნება.