იმუნულოგი, ბიძინა კულუმბეგოვი აცხადებს, რომ თუ კორონავირუსის ახალ შტამს, ომიკრონს ადამიანები იმუნური სისტემის მომზადების გარეშე შეხვდებიან, 1 000 ინფიცირებულიდან 10 გარდაიცვლება. მისივე თქმით, ომიკრონის დომინაციის შემთხვევაში, ყოველდღიურად ვირუსის გამოვლენის შემთხვევებმა, შესაძლოა, 10 000-ს გადააჭარბოს, რაც საქართველოს ჯანდაცვის სისტემისთვის "სრული კატასტროფა" იქნება.

"შეხვდებით იმუნური სისტემის მომზადების გარეშე, მაშინ, სამწუხაროდ, 1 პროცენტი, 1 000 ინფიცირებულიდან ანუ 10 ადამიანი გარდაიცვლება. ეს არის პერსპექტვა, სამწუხარო რეალობა, რაც უნდა ვუთხრათ, ჩვენს მოსახლეობას. გამოსავალი არსებობს და რაც შეიძლება სწრაფად უნდა დაფიქრდეს ყველა და მიიღოს გადაწყვეტილება", — აცხადებს ის.

კულუმბეგოვი ამბობს, რომ კორონავირუსთან მიმართებაში ქვეყნის მოსახელობის დიდი ნაწილი მოწყვლადია. მისივე თქმით, საქართველო ერთ სულ მოსახლეზე ინფიცირებული ადამიანების შემთხვევებით პირველ ხუთეულშია.

"მოზრდილი მოსახლეობის 43% ერთი დოზით და 36% ორი დოზითაა აცრილი. ეს საერთო მოსახლეობის ძალიან დაბალი ციფრია, დაახლოებით 28%, მეტს ვერ ვაღწევთ ჩვენ, მსოფლიო სტატისტიკას თუ შევედარებით. ამიტომ, მოსახლეობის ძალიან დიდი ნაწილი მოწყვლადია. მაგრამ ქვეყანა პირველ ხუთეულშია ერთ სულ მოსახლეზე საერთოდ ინფიცირებული ადამიანების შემთხვევებით, სულ რამდენიმე ჯუჯა სახელმწიფო გვისწრებს წინ, გიბლარტალი და მსგავსი სახელმწიფოები. ამიტომ, მეორე მხრივ, გარკვეული იმუნური ფენა ჩვენს ქვეყანაში არსებობს. მაგრამ კიდევ ერთხეულ უნდა ვთქვათ, რომ როგორც წინასწარი ეპიდემიოლოგიური კვლევები აჩვენებს, დაახლოებით 50%-ზე მეტი ადამიანების, მაინც მოწყვლადები არიან ინფექციის მიმართ, ეს არის ჩვენი მოსახელობის თითქმის მილიონნახევარზე მეტი მოქალაქე", — აღნიშნავს ის.

კულუმბეგოვი კიდევ ერთხელ უსვამს ხაზს, რომ რაც უფრო მეტი ადამიანი იქნება ვაქცინირებული, სიკვდილიანობისა და დაზიანების მაჩვენებელიც მინიმალური იქნება. მისივე თქმით, საქართველო იზოლირებული ქვეყანა არ არის, შესაბამისად, კორონავირუსის ახალი შტამი ქვეყანაში ადრე თუ გვიან შემოვა.

კორონავირუსის ახალი ვარიანტი, ომიკრონი სამხრეთ აფრიკაში 25 ნოემბერს დაფიქსირდა. ჯანდაცვის მსოფლიო ორგანიზაციამ ახალი შტამი შეშფოთების მიზეზად გამოაცხადა. ომიკრონის გამო ევროკავშირის ქვეყნებმა და ამერიკის შეერთებულმა შტატებმა სამხრეთ აფრიკის ქვეყნებიდან ფრენები აკრძალეს. რეგულაციები დაწესდა საქართველოშიც. უწყებათაშორისი საკოორდინაციო საბჭოს გადაწყვეტილებით, 28 ნოემბრიდან 8 ქვეყნიდან შემოსულ მგზავრებს 14-დღიანი კარანტინის გავლა მოუწევთ.