საქართველოს ბანკი პროექტების მხარდაჭერას განაგრძობს. ამჯერად, ბანკის მხარდაჭერით, თბილისი — წიგნის მსოფლიო დედაქალაქის ფარგლებში, თბილისის ილუსტრაციის ფესტივალი გაიმართება. ფესტივალში მონაწილეობას საქართველოში მცხოვრები 34 ილუსტრატორი მიიღებს, რომელთა ნამუშევრებიც საგამოფენო სივრცეში იქნება წარმოდგენილი. ასევე, წარადგენენ 45 ილუსტრატორის ნამუშევრების კატალოგს.

ფესტივალის მსვლელობისას ილუსტრირებული წიგნების პრეზენტაციები და სხვადასხვა ტიპის შეხვედრები იგეგმება. გაიყიდება ილუსტრირებული წიგნები, ილუსტრაციები, ღია ბარათები, აქსესუარები და სხვა ტიპის ნაბეჭდი პროდუქცია.

კერძოდ, 13 დეკემბერს კატალოგის პრეზენტაციის შემდეგ, ილუსტრატორ ანა ჯანელიძესთან გაიმართება შეხვედრა, რომელსაც მოდერატორობას ნიკი თარხან-მოურავი გაუწევს. ფესტივალზე მისულ სტუმრები ირაკლი კეიდიასა და დათო მაჭავარიანს შეხვდებიან თემაზე — გრაფიკული რომანის განვითარება საქართველოში. შეხვედრის მოდერატორი კი დათო სამნიაშვილი იქნება. ფესტივალის პირველ დღეს ლაშა ცქვიტინიძის ელექტრონული მუსიკა დაასრულებს.

რაც შეეხება მეორე დღეს, ფესტივალის სტუმრები ილუსტრატორ ოლესია თავაძეს შეხვდებიან, რომელსაც მოდერატორობას ზაზა აბზიანიძე გაუწევს. ასევე, თამარ ლონდარიძე წარადგენს გამომცემლობა ინტელექტის წიგნს, ქართული მითიური პერსონაჟები. დისკუსიის ფარგლებში გამომცემლობის ილუსტრირებული წიგნების ახალ მიმართულებაზე გაიმართება საუბარი.

ამასთან, სტუმრები შეძლებენ ია გაბუნიას ახალი წიგნის, სად გაქრა დედამიწას პრეზენტაციას დაესწრონ, რომლის მოდერატორიც იქნება ნინო ძანძავა. ფესტივალის ბოლო დღეს გამომცემლობა მელანის ორი ახალი ილუსტრირებული წიგნის წარდგენა, ასევე, გამომცემელთან და ავტორებთან შეხვედრა დახურავს.

თბილისი — წიგნის მსოფლიო დედაქალაქი UNESCO-ს პროექტია, რომლის გენერალური პარტნიორი საქართველოს ბანკია.