ქართული ოცნების თავმჯდომარე, ირაკლი კობახიძე, რომელიც სტრასბურგში ვიზიტით იმყოფება, აცხადებს, რომ ერთ-ერთი განსახილველი თემა, ალბათ, მიხეილ სააკაშვილის იქნება. თუმცა მისი თქმით, უპირველეს ყოვლისა, ქვეყანაში არსებული დღის წესრიგის ცვლილების საჭიროებაზე ისაუბრებენ,

"ყველა თემას შევეხებით, რაც უკავშირდება ადგილობრივ პოლიტიკას, საქართველოში პოლიტიკურ პროცესებს, რა თქმა უნდა, ერთ-ერთი, ალბათ, იქნება სააკაშვილიც. თუმცა ჩვენთვის მთავარია, რომ მივიტანოთ ის გზავნილები, რომელიც უკავშირდება ქვეყნის სამომავლო განვითარებას.

ქვეყნისთვის და ჩვენი პარტნიორებისთვისაც, ბუნებრივია, მნიშვნელოვანია, რომ საქართველოში შეიცვალოს დღის წესრიგი, გამოვიდეთ პოლარიზაციის ჩაკეტილი წრიდან. ეს არის თანაბრად მნიშვნელოვანი, როგორც ჩვენი ქვეყნის მოსახლეობისთვის, ასევე, ყველასთვის, ვისაც გული შესტკივა საქართველოზე.

აქედან გამომდინარე, ჩვენ გარდა ამ დეტალებისა, რომელიც სააკაშვილის პატიმრობას უკავშირდება, პირველ რიგში, სწორედ ამ დღის წესრიგის ცვლილების საჭიროებაზე გვექნება საუბარი", — აღნიშნა მან.

19 ნოემბერს იუსტიციის სამინისტრომ მიხეილ სააკაშვილს გორის სამხედრო ჰოსპიტალში გადაყვანა შესთავაზა, რასაც ექსპრეზიდენტი დათანხმდა და შიმშილობა შეწყვიტა.

სააკაშვილი 50 დღე შიმშილობდა. ადვოკატები, სამედიცინო სფეროს წარმომადგენლები, ომბუდსმენი, მხარდამჭერები, საერთაშორისო პარტნიორები მთავრობას მოუწოდებდნენ, ექსპრეზიდენტი სამოქალაქო კლინიკაში გადაეყვანა, თუმცა ამის ნაცვლად ის ძალის გამოყენებით გლდანის ციხის სამკურნალო დაწესებულებაში გადაიყვანეს. ამის გამო, პროტესტის ნიშნად, სააკაშვილმა სამედიცინო მომსახურებაზე უარი თქვა და მისი მდგომარეობა დამძიმდა, რის შემდეგაც მოწოდებები გადაყვანაზე გახშირდა, თუმცა ხელისუფლება უარზე იყო.

21 ნოემბერს ენდოკრინოლოგმა, ელენე გიორგაძემ განაცხადა, რომ სააკაშვილის მდგომარეობა სტაბილურია და ამ ეტაპზე გართულებები არ აქვს.

8 ნოემბრის შემდეგ, ნაციონალური მოძრაობა საპროტესტო აქციებს მართავდა. მათი მთავარი მოთხოვნა სააკაშვილის კლინიკაში გადაყვანა და მისი გათავისუფლება იყო. როგორც ენმ-ს თავმჯდომარე, ნიკა მელია ამბობდა, სანამ მათი მოთხოვნები არ შესრულდებოდა, დაშლას არ აპირებდნენ და აქციებს ყოველ დღე გამართავდნენ.

მას შემდეგ, რაც სააკაშვილი გორის სამხედრო ჰოსპიტალში გადაიყვანეს და შიმშილობა შეწყვიტა, ოპოზიციამ აქციები შეაჩერა. თუმცა მელია ამბობს, რომ "არაძალადობრივი მეთოდებით" ბრძოლა გაგრძელდება. მას არ დაუკონკრეტებია კონკრეტულად რა გეგმა აქვს ოპოზიციას, მაგრამ აღნიშნა, რომ მთავარი თავგადასავალი არის წინ და სანამ სააკაშვილი არ იქნება დახსნილი "უკანონო პატიმრობიდან" და სანამ ქართულ ოცნებას "სახელმწიფო ექნება მიტაცებული", ბრძოლას არ შეაჩერებენ.