სახალხო დამცველის განცახდებით, მათ ჯანდაცვის მინისტრმა მიმართა და მიხეილ სააკაშვილის კლინიკური მართვის პროცესში კონსულტაციის გაწევისა და ალტერნატიული აზრის მოსმენის მიზნით, ომბუდსმენის მოწვეულ ექსპერტთა ჩართვა სთხოვა. ლომჯარიას განცხადებით, გაითვალისწინებს თხოვნას და ექსპერტთა ჯგუფის დასკვნებსა და რეკომენდაციებს პერიოდულად, სრულფასოვნად გაუზიარებს სამინისტროს ე.წ. მეორე აზრის წარდგენის მიზნით.

"სახალხო დამცველი განმარტავს, რომ მის მიერ შექმნილ ექსპერტთა ჯგუფი აგრძელებს საქმიანობას უცვლელად, თავდაპირველი შემადგენლობითა და მანდატით. მულტიპროფილურ ექსპერტთა/სპეციალისტთა ჯგუფის ფუნქციას წარმოადგენს მიხეილ სააკაშვილისთვის გაწეული სამედიცინო მომსახურების ექსპერტიზა და სახალხო დამცველისთვის დასკვნების/მოსაზრებების წარდგენა.

უნდა აღინიშნოს, რომ პატიმრის ჯანმრთელობის მართვა სახალხო დამცველისა და მის მიერ მოწვეულ ექსპერტთა მანდატს არ მიეკუთვნება. თუმცა, სახალხო დამცველი გაითვალისწინებს ჯანდაცვის მინისტრის თხოვნას და ექსპერტთა ჯგუფის დასკვნებსა და რეკომენდაციებს პერიოდულად, სრულფასოვნად გაუზიარებს სამინისტროს ე.წ. მეორე აზრის წარდგენის მიზნით", — ვკითხულობთ განცხადებაში.

სახალხო დამცველის ინფორმაციით, ექსპერტთა ჯგუფის ვიზიტი გორის სამხედრო ჰოსპიტალში უახლოეს მომავალში განხორციელდება.

გარდა ამისა, ომბუდსმენი ამბობს, რომ მიხეილ სააკაშვილის განთავსების პირობები და გატარებული უსაფრთხოების ღონისძიებები მისმა რწმუნებულებმა 2021 წლის 20 ნოემბერს უკვე შეამოწმეს და გამოვლინდა გარკვეული საკითხები: დასახელდა სასეირნო სივრცისა და ფანჯარასთან დაკავშირებული პრობლემები, სამედიცინო მანიპულაციების ნაწილზე უსაფრთხოების თანამშრომლების დაკვირვება, ვიდეოჩაწერა. მისივე თქმით, ამ საკითხებზე შედგა მყისიერი კომუნიკაცია შესაბამის უფლებამოსილ პირებთან.

"ერთ ეპიზოდში ვიდეოჩაწერის კანონიერების შესწავლის მიზნით, სახალხო დამცველის აპარატმა უკვე მიმართა სახელმწიფო ინსპექტორის სამსახურს. პირობებთან დაკავშირებით დასახელებული საკითხების შესახებ სახალხო დამცველის რწმუნებულებმა პენიტენციური სამსახურის წარმომადგენლებისგან მიიღეს შესაბამისი რეაგირების პირობა, რისი შედეგებიც ასევე შემოწმდება გონივრულ ვადაში", — აცხადებს ომბუდსმენი.

19 ნოემბერს იუსტიციის სამინისტრომ მიხეილ სააკაშვილს გორის სამხედრო ჰოსპიტალში გადაყვანა შესთავაზა, რასაც ექსპრეზიდენტი დათანხმდა. 20 ნოემბერს, გვიან ღამით ჰოსპიტალში გადაყვანის შემდეგ, მან შიმშილობა შეწყვიტა.

ენმ-ს წევრების განცხადებით, სააკაშვილი ექიმებს ენდობა და მკურნალობაზე თანახმაა. 21 ნოემბერს ენდოკრინოლოგმა განაცხადა, რომ მდგომარეობა სტაბილურია და მას გართულებები არ აქვს. პირადმა ექიმმა, ნიკოლზ ყიფშიძემ კი თქვა, რომ მკურნალობის გასაგრძელებლად საჭიროა ფსიქიატრის და ფსიქოლოგის დამატება. დღეს, 22 ნოემბერს სახელმწიფო კონსილიუმის წევრმა ექიმმა, ელენე გიორგაძემ განაცხადა, რომ მკურნალობის შედეგით როგორც ექიმები, ასევე, თვითონ სააკაშვილიც კმაყოფილები არიან.