ექსპრეზიდენტის ადვოკატი, ნიკა გვარამია ადასტურებს, რომ მიხეილ სააკაშვილი გორის სამხედრო ჰოსპიტალში შეიყვანეს. გვარამიას განცხადებით, გლდანის ციხიდან გადაყვანის პროცედურამ ნორმალურად ჩაიარა, ყოველგვარი ინციდენტების გარეშე.

მისივე თქმით, ხვალ იუსტიციის სამინისტროსთან დააზუსტებენ დეტალებს, თუ რა სიხშირით და როგორ შეძლებენ სააკაშვილის მონახულებას.

"ჩვენთვის მნიშნველოვანი იყო სამართლებრივად ამ ყველაფრის დაფისქირება და კმაყოფილი ვართ იმ პროცედურის, რომელიც ჩატარდა — გადმოყვანის და დაბინავების, შესახლებას ამას ვერ დავარქმევ, იმიტომ, რომ კლინიკააა.

უკვე ხვალიდან უნდა დავიწყოთ მსჯელობა მომსვლელების რეჟიმთან დაკავშირებით, ჯერჯერობით გარკვეული წარმოდგენა გვაქვს ამაზე, უბრალოდ, პირველი სიტუაციაა ასეთი და რეფერალურ კლინიკებშიც არ ყოფილა, რამდენადაც მივიღეთ ინფორმაცია, ამგვარი ვიზიტების. პარლამენტის წევრების ვიზიტებზე ვამბობ პირველ რიგში, ადვოკატების ვიზიტები, ბუნებრივია, რომ შეუზღუდავია, თუმცა დროითი შეზღუდვები იქნება იქედან გამომდინარე, რა პროცედურა უტარდება პაციენტს", — განაცხადა მან.

გორის სამხედრო ჰოსპიტლის ეზოში რამდენიმე სათის წინ რეანომობილი და ესკორტი შევიდა. იყო ვარაუდი, რომ კლინიკაში ექსპრეზიდენტი მიხეილ სააკაშვილი გადაიყვანეს, თუმცა ოფიციალურად ეს ინფორმაცია არ დასტურდებოდა.

გუშინ, 19 ნოემბერს კი იუსტიციის სამინისტრომ მიხეილ სააკაშვილს გორის სამხედრო ჰოსპიტალში გადაყვანა შესთავაზა, რასაც ექსპრეზიდენტი დათანხმდა და განაცხადა, რომ განთავსებისთანავე შიმშილობას შეწყვეტს.

სააკაშვილი 50 დღე შიმშილობდა. ადვოკატები, სამედიცინო სფეროს წარმომადგენლები, ომბუდსმენი, მხარდამჭერები, საერთაშორისო პარტნიორები მოუწოდებდნენ მთავრობას, ექსპრეზიდენტი სამოქალაქო კლინიკაში გადაეყვანა, თუმცა ამის ნაცვლად ის ძალის გამოყენებით გლდანის ციხის სამკურნალო დაწესებულებაში გადაიყვანეს. ამის გამო, პროტესტის ნიშნად, სააკაშვილმა სამედიცინო მომსახურებაზე უარი თქვა და მისი მდგომარეობა დამძიმდა, რის შემდეგაც მოწოდებები გადაყვანაზე გახშირდა, თუმცა ხელისუფლება უარზე იყო.

სტრასბურგის სასამართლოს გადაწყვეტილების შემდეგ, რომელმაც სააკაშვილს შიმშილობის შეწყვეტისკენ მოუწოდა, ხოლო სახელმწიფოს მის ჯანმრთელობაზე ინფორმაციის მიწოდებისა და შიმშილობის მერე ადეკვატური მკურნალობა დაავალა, ექსპრეზიდენტმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე