ნაციონალური მოძრაობის წარმომადგენელი და გენეტიკის ლაბორატორიის დირექტორი, გიორგი ჩალაძე ამბობს, რომ ექსპრეზიდენტი მიხეილ სააკაშვილი ექიმებს ენდობა და სააკაშვილი მასთან თანამშრომლობს. ექსპეზიდენტის მონახულების შემდეგ ჟურნალისტებთან ჩალაძემ განაცხადა, რომ მესამე პრეზიდენტის ჯანმრთელობა 50-დღიან ძალიან მკაცრ შიმშილის მდგომარეობას შეესაბამება.

"ექიმები თავდაუზოგავად შრომობენ, ყველაფერს აკეთებენ. ჩემი თვალით ვნახე, როგორ შრომობენ, თავდადებით იკვლევენ. ცდილობენ გაარკვიონ, რომელ ორგანოს რა დაზიანება აქვს და შემდეგ დაგეგმონ თერაპიის ის კურსი, რაც სჭირდება. ბატონი პრეზიდენტის ჯანმრთელობა საჭიროებს ძალიან მაღალ ტექნოლოგიურ, მაღალკვალიფიციურ, სიღრმისეულ კვლევებს. ბატონმა სააკაშვილმა, როგორც განაცხადა, ენდობა ექიმებს, ის მათთან თანამშრომლობს", — აღნიშნავს გიორგი ჩალაძე.

მთავრობის მიერ შექმნილი ექიმთა კონსილიუმი გორის სამხედრო ჰოსპიტალში დღეს პირველად ჩავიდა. ექიმები ექსპრეზიდენტ მიხეილ სააკაშვილის შიმშილობის შემდგომ მკურნალობის პროცედურებზე ამ წუთებშიც მსჯელობენ.

გუშინ, 19 ნოემბერს კი იუსტიციის სამინისტრომ მიხეილ სააკაშვილს გორის სამხედრო ჰოსპიტალში გადაყვანა შესთავაზა, რასაც ექსპრეზიდენტი დათანხმდა და განაცხადა, რომ განთავსებისთანავე შიმშილობას შეწყვეტს.

სააკაშვილი 50 დღე შიმშილობდა. ადვოკატები, სამედიცინო სფეროს წარმომადგენლები, ომბუდსმენი, მხარდამჭერები, საერთაშორისო პარტნიორები მთავრობას მოუწოდებდნენ, ექსპრეზიდენტი სამოქალაქო კლინიკაში გადაეყვანა, თუმცა ამის ნაცვლად ის ძალის გამოყენებით გლდანის ციხის სამკურნალო დაწესებულებაში გადაიყვანეს. ამის გამო, პროტესტის ნიშნად, სააკაშვილმა სამედიცინო მომსახურებაზე უარი თქვა და მისი მდგომარეობა დამძიმდა, რის შემდეგაც მოწოდებები გადაყვანაზე გახშირდა, თუმცა ხელისუფლება უარზე იყო.

სტრასბურგის სასამართლოს გადაწყვეტილების შემდეგ, რომელმაც სააკაშვილს შიმშილობის შეწყვეტისკენ მოუწოდა, ხოლო სახელმწიფოს მის ჯანმრთელობაზე ინფორმაციის მიწოდებისა და შიმშილობის მერე ადეკვატური მკურნალობა დაავალა, ექსპრეზიდენტმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.