უკრაინის პრეზიდენტმა ვოლოდიმირ ზელენსკიმ აშშ-ის პრეზიდენტ დონალდ ტრამპთან სატელეფონო საუბარი გამართა და მხარეები ნიუ-იორკში შეხვედრაზე შეთანხმდნენ. ამის შესახებ ვოლოდიმირ ზელენსკი სოციალურ ქსელში წერს.

"ახლახან ვესაუბრე პრეზიდენტ ტრამპს. ეს იყო მნიშვნელოვანი საუბარი და ბევრი რამის განხილვა შევძელით. შევთანხმდით ნიუ-იორკში შეხვედრაზე და ამ შეხვედრას ბევრის შეცვლა შეუძლია. არსებობს დიპლომატიური იმპულსი", — დაწერა ზელენსკიმ.

ზელენსკიმ აღნიშნა, რომ მან მადლობა გადაუხადა სტივ უიტკოფსა და ჯარედ კუშნერს კიევში ვიზიტისთვის: "ჩვენ დეტალურად განვიხილეთ არსებითი საკითხები და მათუკრაინაში არსებული ვითარება კარგად დაათვალიერეს", — დაწერა ზელენსკიმ.

"გვაქვს იდეები დეესკალაციის ზომებისა და ფუნდამენტური უსაფრთხოების საკითხებთან დაკავშირებით — ენერგეტიკა, სურსათი და ადამიანების სიცოცხლის დაცვა. ჩვენ ვმუშაობთ ამერიკულ გუნდთან და მზად ვართ, გადავდგათ ნამდვილად სერიოზული ნაბიჯები", — დასძინა ზელენსკიმ.

მან ასევე მადლობა გადაუხადა ტრამპს ლინდსი გრემის კანონპროექტზე ხელმოწერისთვის.

ვაშინგტონში "რადიო თავისუფლების" უფროსი კორესპონდენტის, ალექს რაუფოღლუს ცნობით ლიდერები ერთმანეთს სამშაბათს 22 სექტემბერს შეხვდებიან.

"ორი წყაროს ინფორმაციით, პრეზიდენტი ტრამპი და უკრაინის პრეზიდენტი ვოლოდიმირ ზელენსკი ამ სამშაბათს, ნიუ-იორკში, 13:15 საათზე შეხვედრას გეგმავენ.

მაღალი მნიშვნელობის შეხვედრა სამშვიდობო პროცესის განახლებული ძალისხმევის ფონზე გაიმართება", — წერს რაუფოღლუ.