სახელმწიფო კონსილიუმის წევრმა ექიმმა, ელენე გიორგაძემ ექსპრეზიდენტ მიხეილ სააკაშვილის მონახულების შემდეგ განაცხადა, რომ მკურნალობის შედეგით როგორც ექიმები, ასევე, თვითონ სააკაშვილიც კმაყოფილები არიან. მისი თქმით, შიმშილობის შეწყვეტის მესამე დღეს სააკაშვილის მდგომარეობა დამაკმაყოფილებელია და მას ჩივილები არ აქვს.

"დღეს დავამთავრეთ მესამე კრიტიკული დღე. ყველა ექიმი თვითონაც პაციენტი კმაყოფილები ვართ. ასე რომ ვთქვათ, "ჩეპეს" გარეშე გავიარეთ სამივე დღე. მეტიც, დღეს კალორაჟი და კვება იყო უფრო გაფართოებული. თავს გრძნობს დამაკმაყოფილებლად, სტაბილურია მისი მდგომარეობა, ჩივილები არ ჰქონდა, მაგრამ ჩვენ მაინც ეხოკარდიოგრაფია გავუკეთეთ, ყველა ანალიზი კეთდება ყოველდღე, შიმშილის მარკერები ნორმალურია, როგორც იქნა ცილაც, უკვე დაიწყო ნელ-ნელა მოწესრიგებაც", — თქვა მან.

ექიმის თქმით, ექსპრეზიდენტის კვების კალორაჟი გაფართოვდება, ხოლო ვიტამინების დოზები შემცირდება. გიორგაძე ამბობს, რომ ხვალიდან მკურნალობა დაკვირვების ფაზაში გადადის.

"ამასობაშიც უკვე რაღაც გარკვეული ვიტამინების დოზებს ცოტა ვამცირებთ, რომ ყველაფერი თანხვედრაში იყოს. ხვალიდან გადავდივართ უკვე დაკვირვების სტადიაში. ისევ ვიქნები მთელი დღე აქ, ნელ-ნელა გავაფართოებთ კალორაჟს. ნელ-ნელა შევიყვანთ სხვადასხვა პროდუქტს, ეს გაგრძელდება ალბათ ორშაბათამდე, მერე უკვე გადავალთ და აგიხსნით სულ სხვა კვებას", — დასძენს ექიმი.

19 ნოემბერს იუსტიციის სამინისტრომ მიხეილ სააკაშვილს გორის სამხედრო ჰოსპიტალში გადაყვანა შესთავაზა, რასაც ექსპრეზიდენტი დათანხმდა და შიმშილობა შეწყვიტა.

სააკაშვილი 50 დღე შიმშილობდა. ადვოკატები, სამედიცინო სფეროს წარმომადგენლები, ომბუდსმენი, მხარდამჭერები, საერთაშორისო პარტნიორები მთავრობას მოუწოდებდნენ, ექსპრეზიდენტი სამოქალაქო კლინიკაში გადაეყვანა, თუმცა ამის ნაცვლად ის ძალის გამოყენებით გლდანის ციხის სამკურნალო დაწესებულებაში გადაიყვანეს. ამის გამო, პროტესტის ნიშნად, სააკაშვილმა სამედიცინო მომსახურებაზე უარი თქვა და მისი მდგომარეობა დამძიმდა, რის შემდეგაც მოწოდებები გადაყვანაზე გახშირდა, თუმცა ხელისუფლება უარზე იყო.