ალეკო ელისაშვილის საქმესთან დაკავშირებით საქართველოს სახალხო დამცველი თბილისის სააპელაციო სასამართლოს "სასამართლოს მეგობრის" (Amicus Curiae) პოზიციით მიმართავს. ამის შესახებ სახალხო დამცველმა ინფორმაცია სოციალურ ქსელში გამოაქვეყნა.

სახალხო დამცველის აპარატმა საქმის მასალები და მსჯავრდებულის ადვოკატის მიერ წარმოდგენილი განაჩენი შეისწავლა, რომლითაც ელისაშვილი ტერორისტული აქტის მცდელობაში ცნეს დამნაშავედ.

ომბუდსმენის შეფასებით, პირველი ინსტანციის სასამართლომ სათანადო სიღრმით ვერ გამოიკვლია და არ დაასაბუთა სპეციალური განზრახვა — კერძოდ, ტერორისტული მიზანი, რომელიც კანონის თანახმად მსგავსი კვალიფიკაციისთვის აუცილებელ შემადგენელ ელემენტს წარმოადგენს. ნაცვლად ამისა, სასამართლომ იგი ავტომატურად გააიგივა ბრალდებულის პოლიტიკური პროტესტის მოტივთან, მაშინ როდესაც სამართლებრივად მოტივი და მიზანი მკაცრად უნდა გამიჯნულიყო.

"საქართველოს სახალხო დამცველმა თბილისის სააპელაციო სასამართლოს ალექსანდრე ელისაშვილის საქმეზე სასამართლოს მეგობრის მოსაზრებით (Amicus Curiae) მიმართა.

სახალხო დამცველის აპარატი გაეცნო მსჯავრდებულის ადვოკატის მიერ წარმოდგენილ სასამართლოს განაჩენს, რომლითაც ალექსანდრე ელისაშვილი დამნაშავედ იქნა ცნობილი ტერორისტული აქტის მცდელობაში.

აღსანიშნავია, რომ ტერორისტული აქტი არის სპეციალური მიზნით განსაზღვრული დანაშაული, რომლისთვისაც "ტერორისტული მიზანი" აუცილებელ შემადგენელ ელემენტს წარმოადგენს. აღნიშნულ მოთხოვნას თავად სისხლის სამართლის კოდექსი აწესებს და ტერორისტული მიზნის სამ კატეგორიას გამოყოფს. როგორც სუბიექტური შემადგენლობის აუცილებელი ნაწილი, იგი წარმოადგენს სასამართლო განხილვისათვის საკვანძო მნიშვნელობის საკითხს, რომელიც სათანადოდ დასაბუთებული და არგუმენტებით გამყარებული უნდა იყოს.

განაჩენის შესწავლის შედეგად დადგინდა, რომ თბილისის საქალაქო სასამართლომ სათანადო ყურადღება არ დაუთმო სპეციალური განზრახვის, კერძოდ, ტერორისტული მიზნის გამოკვეთას და იგი, ავტომატურად, ალექსანდრე ელისაშვილის პოლიტიკური პროტესტის მოტივთან გააიგივა.

სახალხო დამცველმა სასამართლოს მეგობრის მოსაზრებაში მიმოიხილა საერთაშორისო სტანდარტები, ადამიანის უფლებათა ევროპული სასამართლოს პრაქტიკა, ასევე სამეცნიერო და სხვა ნაშრომები სასამართლო გადაწყვეტილების დასაბუთების სტანდარტების, უშუალოდ ტერორისტულ დანაშაულებთან მიმართებით სპეციალური განზრახვის გამოკვეთის მნიშვნელობისა და, ასევე, მოტივისა და მიზნის გამიჯვნის საჭიროების შესახებ.

სახალხო დამცველი იმედს გამოთქვამს, რომ წარდგენილი სასამართლოს მეგობრის მოსაზრება მეტ სიცხადეს შეიტანს სამართლებრივი საკითხის განხილვის პროცესში და დაეხმარება სააპელაციო სასამართლოს, მოცემული დანაშაული და მისი შემადგენელი ელემენტები შეაფასოს იმ სამართლებრივი სიზუსტით, როგორც ამას საქართველოს სისხლის სამართლის კოდექსი, დანაშაულის სპეციფიკა, დასაბუთების სტანდარტები და სამართლის ზოგადი პრინციპები მოითხოვს", — წერია განცხადებაში.

ცნობისთვის, 10 ივლისს პარტია მოქალაქეების ლიდერს, ალეკო ელისაშვილს ტერორიზმის ბრალდებით 13 წლით თავისუფლების აღკვეთა მიესაჯა — გადაწყვეტილება მოსამართლე გიორგი გელაშვილმა მიიღო.

ოფიციალური ბრალდების მიხედვით, პოლიტიკოსს გამოძიება სისხლის სამართლის კოდექსის 19-323-ე მუხლის პირველ ნაწილს ედავებოდა. აღნიშნული მუხლი ტერორისტულ აქტს (აფეთქება, ცეცხლის წაკიდება, იარაღის გამოყენება ან სხვა მსგავსი ქმედება) გულისხმობს, რომელიც ჩადენილია ტერორისტული მიზნით და საფრთხეს უქმნის ადამიანის სიცოცხლეს ან იწვევს მძიმე ქონებრივ ზიანს.