ადვოკატ ტარიელ კაკაბაძის ინფორმაციით, კანონიერი ქურდის ძმის, ლევან ჯანგველაძის მკვლელობის საქმეზე ბრალდებული დავით მიქაძე საფრანგეთში დააკავეს.

მიმდინარე წლის 6 მაისს ჯანგველაძის შეკვეთითა და ანგარებით მკვლელობის ორგანიზებაში ბრალდებული ძმები — დავით და გიორგი მიქაძეები სასამართლომ დამნაშავედ ცნო და უვადო პატიმრობა მიუსაჯა.

სამი მსჯავრდადებულიდან მხოლოდ გიორგი მიქაძე იმყოფება საქართველოში. დავით მიქაძე და გიორგი ჯოხაძე საზღვარგარეთ მიმალვაში იმყოფებიან.

ძმებ მიქაძეებსა და გიორგი ჯოხაძეს ბრალი სისხლის სამართლის კოდექსის 25-109 მუხლის "ნ" ქვეპუნქტით ჰქონდათ წარდგენილი, რაც ანგარებითა და შეკვეთით მკვლელობის ორგანიზებას გულისხმობს. გარდა ამისა, გიორგი ჯოხაძეს ბრალი წარდგენილი ჰქონდა ასევე სისხლის სამართლის კოდექსის 236-ე მუხლის მე-6 ნაწილის "ა" და "ბ" ქვეპუნქტით, რაც ცეცხლსასროლი იარაღისა და საბრძოლო მასალის ჯგუფურად მართლსაწინააღმდეგო შეძენას, შენახვასა და გასაღებას გულისხმობს.

მკვლელობა 2025 წლის 14 მარტს, გვიან ღამით, ვაკეში, ჭავჭავაძის გამზირზე მოხდა. მას შემდეგ, რაც ლევან ჯანგველაძე ახლობლის გასვენებიდან ბრუნდებოდა, გზის გადაკვეთისას გელა უძილაურმა მას ცეცხლი გაუხსნა.

მედიაში გავრცელებული ინფორმაციით, ძმები მიქაძეები კრიმინალურ სამყაროსთან და ოთარ ფირცხალაძესთან დაახლოებული პირები არიან.

ლევან ჯანგველაძის მკვლელობის საქმეზე იხილეთ სრულად: