გერმანიის 16 ფედერალური მიწიდან ორში — ბერლინსა და მეკლენბურგ-წინა პომერანიაში — ახალი საკანონმდებლო ორგანოების არჩევნები გაიმართა. ორივე მიწის არჩევნებში წარმატებას მიაღწიეს იდეოლოგიურად განსხვავებულმა ძალებმა: მეკლენბურგ-წინა პომერანიაში მკვეთრად გაიზარდა ულტრამემარჯვენე AfD-ის მხარდაჭერა, ხოლო ბერლინში — მემარცხენე მემარცხენეების პარტიის (Die Linke). ორივე შემთხვევაში ამ პარტიებმა წინა არჩევნებთან შედარებით მხარდაჭერა მნიშვნელოვნად გაზარდეს.

რაც შეეხება კანცლერ ფრიდრიხ მერცის ქრისტიან-დემოკრატიულ კავშირს (CDU), პარტიამ მარცხი განიცადა.

მეკლენბურგ-წინა პომერანიაში დამაჯერებელი შედეგი აჩვენა ულტრამემარჯვენე პარტიამ "ალტერნატივა გერმანიისთვის" (AfD), რომელმაც 2021 წლის არჩევნებთან შედარებით ხმების წილი თითქმის გააორმაგა და 38%-ით პირველი ადგილი დაიკავა. შტატის მოქმედმა პრემიერმინისტრმა, სოციალ-დემოკრატმა (SPD) მანუელა შვესიგმა ხმების 36% მოიპოვა და გამარჯვებულს მცირედით ჩამორჩა.

გერმანიის დედაქალაქში კი მთავარი გამარჯვებული სოციალისტური "მემარცხენეების პარტიაა", რომელმაც ხმების დაახლოებით 25% მიიღო და პირველ ადგილზე გავიდა. მანაც, ისევე როგორც AfD-მ მეკლენბურგ-წინა პომერანიაში, შეძლო თავისი მხარდაჭერის გაორმაგება. ბერლინში წარმატებას მიაღწია AfD-სმაც, რომელმაც ხმების 16% აიღო და მესამე ძალად ჩამოყალიბდა. მიღებული შედეგებითა და სოციალ-დემოკრატებისა და "მწვანეების" მხარდაჭერით, სოციალისტებს ბერლინში კოალიციური მთავრობის შექმნის შესაძლებლობა ეძლევათ.

AfD მიგრაციის პოლიტიკის გამკაცრებას და განათლების სისტემის მნიშვნელოვან ცვლილებას გეგმავს. პარტიის გეგმით, თავშესაფრის მაძიებლებსა და ლტოლვილებს მუშაობა დაევალებათ, ასევე გაიზრდება ქვეყანაში არალეგალურად მყოფი პირების დეპორტაციის მასშტაბი.

განათლების სფეროში AfD სასკოლო განათლების სავალდებულოობის გაუქმებას და მშობლებისთვის შვილების სახლში სწავლების შესაძლებლობის დაშვებას გეგმავს.

რაც შეეხება SPD-ის, პარტიის პოლიტიკის მთავარი ხაზი ეკონომიკური ზრდისა და სოციალური კეთილდღეობის ერთმანეთთან დაკავშირებაა. ოს მხარს უჭერს ძლიერ სახელმწიფოს, დასაქმებულთა უფლებების დაცვას და ხელფასების ზრდას. SPD-ის ხედვით, სახელმწიფო აქტიურად უნდა ჩაერთოს ინფრასტრუქტურის, განათლებისა და ახალი ტექნოლოგიების განვითარებაში. პარტია ასევე საუბრობს ხელმისაწვდომ საცხოვრებელზე, სოციალური დაცვისა და პენსიების შენარჩუნებაზე. ეკონომიკის მიმართულებით SPD-ის მიზანია გერმანიის ინდუსტრიისა და სამუშაო ადგილების დაცვა და ენერგიის ფასების შემცირება.