ევროპარლამენტარი და ევრონესტის თავმჯდომარე ანდრიუს კუბილიუსის განცხადებით, მას არ გაუკვირდება, თუ ერთს დღეს საქართველოს მოსახლეობას ქართული ოცნების მმართველობაში ყოფნასა და ევროკავშირში გაწევრიანებას შორის არჩევანის გაკეთება მოუწიოთ. მისივე თქმით, ამ ორის ერთმანეთთან შეჯერება შეიძლება რთული გახდეს.

"არ გამიკვირდება, დადგეს დრო, როცა საქართველოს მოსახლეობას მოუწიოს არჩევანის გაკეთება — ქართული ოცნება ხელისუფლებაში, ან რეალური ინტეგრაცია ევროკავშირში, რადგან ამის შეჯერება შეიძლება ძალიან გართულდეს", — განაცხადა კუბილიუსმა საქართველოში მიმდინარე პროცესებზე საუბრისას.

საქართველოში კვლავ პოლიტიკური კრიზისია. დაძაბულობა განსაკუთრებით ექსპრეზიდენტ მიხეილ სააკაშვილის ქვეყანაში ჩამოსვლამ და მისმა დაპატიმრებამ გაამწვავა. სააკაშვილი ერთ თვეზე მეტია შიმშილობს.

8 ნოემბერს ის მისი და მისი ადვოკატების სურვილის საწინააღმდეგოდ რუსთავის პენიტენციური დაწესებულებიდან გლდანის ციხის საავადმყოფოში 8 ნოემბერს გადაიყვანეს. უფლებადამცველებმა, ოჯახის წევრებმა და ომბუდსმენმა ერთი საათის განმავლობაში არ იცოდნენ, სად იყო სააკაშვილი.

სახალხო დამცველ ნინო ლომჯარიას განცხადებით, სააკაშვილს ციხეში უთხრეს, რომ ის სამოქალაქო კლინიკაში უნდა გადაეყვანათ და შესაბამისად, ის აღნიშნულ შეთავაზებას დათანხმდა. მიუხედავად ამისა, სააკაშვილი მაინც ციხის საავადმყოფოში გადაიყვანეს, მოგვიანებით კი გაავრცელეს კადრები, რომლითაც სურთ დაამტკიცონ, რომ ექსპრეზიდენტს #12 დაწესებულება მისი ნების საწინააღმდეგოდ არ დაუტოვებია.

ფიზიკურ ძალადობაზე საუბრის გარდა, სააკაშვილი წერილში ამბობს, რომ #18 დაწესებულებაში გადასვლისას ციხის ერთ-ერთმა თანამშრომელმა უთხრა: "აჰა, ჩიტო, ხომ ჩაგიგდეთ ხელში".

იუსტიციის მინისტრი ამტკიცებს, რომ რუსთავის ციხიდან გლდანში გადაყვანისას არცერთი პროცედურა და ნორმა არ ყოფილა დარღვეული. მისივე მტკიცებით, სააკაშვილმა ციხეში შეყვანისას თანამშრომლებს სიტყვიერი და ფიზიკური შეურაცხყოფა მიაყენა, რაზეც გენერალურმა ინსპექციამ გამოძიება დაიწყო.