იუსტიციის მინისტრის, რატი ბრეგაძის ინფორმაციით, გლდანის ციხეში გადაყვანის შემდეგ ექსპრეზიდენტმა, მიხეილ სააკაშვილმა ციხის თანამშრომლებს სიტყვიერი და ფიზიკური შეურაცხყოფა მიაყენა. მისივე თქმით, ამ საკითხის შესწავლას გენერალური ინსპექცია დაიწყებს და ექნებათ შესაბამისი რეაგირება.

"როდესაც მიხეილ სააკაშვილი იყო შესახლებული ახალ დაწესებულებაში, მე-18 დაწესებულებაში, მან სამწუხაროდ მიაყენა, როგორც ფიზიკური, ასევე სიტყვიერი შეურაცხყოფა ჩვენს თანამშრომლებს. აქვე გეტყვით, რომ ეს არიან ის თანამშრომლები, რომლებიც 24 საათის განმავლობაში ზრუნავენ ამ ქვეყნის უსაფრთხოებაზე და თითოეული პატიმრის უფლების დაცვაზე და ჩვენ ვერავის მივცემთ ამ თანამშრომლებზე შეურაცხყოფის მიყენების უფლებას და რა თქმა უნდა, იქნება შესაბამისი სამართლებრივი რეაგირება ჩვენი მხრიდან", — განაცხადა მან.

რაც შეეხება გადაყვანის საკითხს, მისი თქმით, რადგან მათი "ოპონენტები ცდილობდნენ გარკვეულ ხელშეშლას" პენიტენციურმა სამსახურმა ის უსაფრთხოდ გადაიყვანა. მან არ დააზუსტა დეტალები, სააკაშვილი თვითმფრინავით გადაიყვანეს თუ ბრონირებული მანქანით. ამავდროულად ის ამტკიცებს, რომ სააკაშვილის გადაყვანისას არცერთი წესი არ ყოფილა დარღვეული და როდესაც ის შეიყვანეს დაწესებულებაში, აცნობეს შესაბამის პირებს.

"როდესაც ვინმე რაიმე პროცედურის დარღვევაზე საუბრობს, აბსოლუტურად არცერთი ნორმა არ იყო დარღვეული და როდესაც იგი იყო შესახლებული შესაბამის დაწესებულებაში, შესაბამისი წესით ეცნობა იმ პირებს, რომლებმაც უნდა მიიღონ შესაბამისი სახის ინფორმაცია", — განაცხადა მან.

ბრეგაძის განმარტებით, ექსპრეზიდენტი მიხეილ სააკაშვილი გლდანის დაწესებულებაში გადაიყვანეს, რადგან მან უარი თქვა მკურნალობის არსებით ნაწილზე და ჯანმრთელობის მდგომარეობის რისკის მინიმალიზაცია იყო საჭირო. მისი თქმით, სააკაშვილის მეთვალყურეობა იქ უფრო უკეთესი იქნება.

ექსპრეზიდენტი მიხეილ სააკაშვილი მისი და მისი ადვოკატების სურვილის საწინააღმდეგოდ რუსთავის მე-12 პენიტენციური დაწესებულებიდან გლდანის მე-18 დაწესებულების საავადმყოფოში გადაიყვანეს. ეს ინფორმაცია პენიტენციურმა სამსახურმა ერთი საათის შემდეგ დაადასტურა — მას შემდეგ, რაც რუსთავის ციხიდან აფრენილი ვერტმფრენი გლდანის ციხის თავზე გამოჩნდა. ამ დროის განმავლობაში მის ადვოკატებსა და ოჯახის წევრებს, ისევე, როგორც სახალხო დამცველს, არ ჰქონდათ ინფორმაცია სააკაშვილის ადგილსამყოფელის შესახებ.