ცხოველთა უფლებადამცველისა და ბიზნესმენის, თამაზ ელიზბარაშვილის საქმეში 7 დაზარალებულიდან ერთ-ერთი ქართული ოცნების მხარდამჭერი შაკო კუჭაშვილია.

კუჭაშვილის ვერსიით, 30 აგვისტოს ელიზბარაშვილთან კონფლიქტი მოუვიდა, "ვინაიდან ამ ადამიანს წარსულში მასზე და მისი ოჯახის წევრებზე შეურაცხმყოფელი კომენტარი ჰქონდა დაწერილი". კუჭაშვილის განმარტებით, შემთხვევა სიტყვიერ დაპირისპირებას არ გასცდენია და სიტუაციის განმუხტვისთვის მისი მეგობრებიც ჩაერთნენ. პროკურატურის და კუჭაშვილის ვერსიით, მუქარის შემდეგ ელიზბარაშვილი ნახევარ საათში რესტორანში დაბრუნდა და შეკრებილებს იარაღით დაემუქრა.

"30 აგვისტოს, რესტორან "სხვაში", თამაზ ელიზბარაშვილთან სიტყვიერი კონფლიქტი მომივიდა, ვინაიდან ამ ადამიანს წარსულში ჩემი და ჩემი ოჯახის წევრებზე შეურაცხმყოფელი კომენტარი ჰქონდა დაწერილი.

ინცინდენტში, ვითარების განმუხტვის მიზნით, ჩემი მეგობრებიც ჩაერთნენ. შემთხვევა არ გასცდენია სიტყვიერ კამათს — არც გინებას, არც შეურაცხყოფას და, მით უფრო, ხელით შეხებას ადგილი არ ჰქონია. ელიზბარაშვილს მოვუწოდე, რომ მომავალში თავი შეეკავებინა ჩემი და, მითუმეტეს, ჩემი ოჯახის შეურაცხყოფისგან. მისი ასაკის გათვალისწინებით, მომხდარი უსიამოვნობის გამო ბოდიშიც კი მოვუხადე და ვუთხარი, კონფლიქტი ამოწურულად ჩაგვეთვალა.

თუმცა, ელიზბარაშვილი მომენტალურად გახდა აგრესიული და გვითხრა — "ამას ასე არ დავტოვებ, ნახევარ საათში დავბრუნდები და ყველანი აქ დამხვდითო" და მართლაც, ელიზბარაშვილი რესტორანთან, სავარაუდოდ, ცეცხლსასროლი იარაღით დაბრუნდა.
ამ ფაქტის შესახებ გაიგო მთელმა რესტორანმა, მათ შორის, რესტორნის დაცვის სამსახურმაც, რომელიც, როგორც ჩემთვის არის ცნობილი, იარაღით მისულ ელიზბარაშვილს რესტორანში შესვლის შესაძლებლობას არ აძლევდა," — წერს კუჭაშვილი.

კუჭაშვილი ამტკიცებს, რომ ელიზბარაშვილი მათი საჩივრის საფუძველზე არ დაუკავებიათ და მათ მხოლოდ გამოძიებას მისცეს ჩვენება.

"წმინდა წყლის სიცრუეა ელიზბარაშვილის, მისი ახლობლების და მხარდამჭერი მედიების მტკიცება, თითქოს ის ჩვენი საჩივრის საფუძველზეა დაკავებული. არც მე და არც ინციდენტში მონაწილე ჩემს არც ერთ მეგობარს პოლიციაში არავითარი საჩივარი არ შეგვიტანია. საქმის აღძვრის შესახებ მხოლოდ მას შემდეგ შევიტყვეთ, რაც სამართალდამცავმა ორგანომ დაგვიკავშირდა და გამოკითხვაზე დაგვიბარა. ჩვენ, კანონის მოთხოვნების შესაბამისად, ჩვენება მივეცით გამოძიებას რესტორანში მომხდარის შესახებ.

სამართლებრივ სახელმწიფოში, ხალხმრავალ ადგილას იარაღით გადაადგილების აღკვეთას არანაირი "ჩივილი" არ სჭირდება,"— წერს კუჭაშვილი.

პროკურატურის ვერსია

1-ელ სექტემბერს, დაახლოებით საღამოს 9 საათზე, ბიზნესმენი თამაზ ელიზბარაშვილი საკუთარ ბინაში ჩხრეკისას დააკავეს, მანამდე სამართალდამცავებმა ჩხრეკა ჩაატარეს მის ავტომობილში. როგორც პოლიციელები ადგილზე აცხადებდნენ იარაღს ეძებდნენ.

პროკურატურამ ელიზბარაშვილს სისხლის სამართლის ბრალი წარუდგინა, რაც ჯანმრთელობის დაზიანებისა და სიცოცხლის მოსპობის მუქარას გულისხმობს და ერთ წლამდე პატიმრობას ითვალისწინებს.

უწყების ცნობით, 30 აგვისტოს თბილისში, ერთ-ერთ რესტორანში, თამაზ ელიზბარაშვილს დაზარალებულათან ჰქონდა სიტყვიერი კონფლიქტი, რა დროსაც დაემუქრა და გააფრთხილა, რომ დაახლოებით 30 წუთში დაბრუნდებოდა. ის მართლაც დაბრუნდა. პროკურატურის მტკიცებით, "ელიზბარაშვილი იყო შეიარაღებული და ცდილობდა რესტორანში შეჭრას. ასევე, განაგრძობდა მუქარას და გინებას დაზარალებულების მისამართით".