ექსპრეზიდენტის ადვოკატები აცხადებენ, რომ მიხეილ სააკაშვილის კლინიკაში გადაყვანის შესახებ არ იცოდნენ და ამ დრომდე არ აქვთ ინფრომაცია გაიყვანეს თუ არა ის ციხიდან, ან რომელ კლინიკაში.

დიმიტრი საძაგლიშვილი ამბობს, რომ ამ ეტაპზე მხოლოდ ის იციან, რაც მედიით გავრცელდა და ელოდებიან, როდის შეატყობინებენ დამატებით დეტალებს. ბექა ბასილაიას თქმით კი, დღევანდელი შეხვედრისას ციხეში სააკაშვილის გადაყვანასთან დაკავშირებით არავითარი მინიშნება არ არსებობდა.

"ეს არის პარტიზანული ქცევა, ეს არის შეშინებული ხელისუფლების ქცევა. დღეს, როდესაც მიხეილ სააკაშვილს შევხვდით, არავითარი სიგნალი, არავითარი ინფორმაცია არ არსებობდა, რომ დღეს მოხდებოდა გადაყვანა. თუმცა ის, რომ გადაყვანა უნდა მომხდარიყო მიხეილ სააკაშვილის მაღალპროფილურ კლინიკაში, ეს აუცილებლობაა, მაგრამ ეს არ უნდა ყოფილიყო ასეთი ფორმით გაკეთებული. მითუმეტეს, არც კი ვიცით სადაა გადაყვანილი მიხეილ სააკაშვილი. ეს არის გატაცება პრაქტიკულად", — აცხადებს ბასილაია.

ცოტა ხნის წინ რუსთავის ციხესთან ვერტმფრენი გამოჩნდა, რის შემდეგაც გავრცელდა ინფორმაცია, რომ მიხეილ სააკაშვილი ციხიდან სამედიცინო დაწესებულებაში გადაყავდათ. ექსპრეზიდენტის დედა, გიული ალასანია აცხადებს, რომ სააკაშვილი პენიტენციური დაწესებულებიდან გაიყვანეს.

რუსთავის ციხიდან გამოსვლის შემდეგ სააკაშვილის პირადმა ექიმმა, ნიკოლოზ ყიფშიძემ განაცხადა, რომ ანალიზებზე დაყრდნობით კონსილიუმი ერთად შეთანხმდა ექსპრეზიდენტის კლინიკაში გადაყვანის აუცილებლობაზე.