ექსპრეზიდენტის, მიხეილ სააკაშვილის დედა, გიული ალასანია აცხადებს, რომ სააკაშვილი პენიტენციური დაწესებულებიდან გაიყვანეს. მისი თქმით, არ იცის სად წაიყვანეს, თუმცა ამბობს, რომ ტერიტორიაზე იმყოფებოდნენ ბრონირებული მანქანები და ვერტმფრენი. ალასანიას ვარაუდით, სწორედ მათი დახმარებით გადაიყვანეს მესამე პრეზიდენტი.

"იმიტომ ვერ შევდივარ, რომ აღარ არის, სადღაც გაიყვანეს, როგორც ჩანს. ინფორმაცია არა მაქვს, მაქვს, რომ არ არის, აღარ არის. ჩანს, რომ არ არის.

ინფორმაცია მაქვს, რომ შეიკრიბა კონსილიუმი, რომლებმაც დაწერეს, რომ გადაყვანილი უნდა იყოს მრავალფუნქციურ საავადმყოფოში, მაგრამ ამასობაში იგნორირებით ყველაფრის, ადამიანის უფლებების, კონსილიუმი გადაწყვეტილების, თვალწინ აგვართვეს და სადღაც გააქრეს. გაიარა ორმა ბრონირებულმა მანქანამ და მერე გადაგვიფრინა ვერტმფრენმა", — აცხადებს ის.

On.ge ცდილობს პენიტენციურ სამსახურთან და იუსტიციის სამინისტროსთან დაკავშირებას, თუმცა ზარებს არ პასუხობენ.

ცოტა ხსნის წინ რუსთავის ციხიდან გამოვიდა სააკაშვილის პირადი ექიმი, ნიკოლოზ ყიფშიძე. მისი თქმით, ანალიზებზე დაყრდნობით კონსილიუმი ერთად შეთანხმდა, რომ აუცილებელია ექსპრეზიდენტის კლინიკაში გადაყვანა.

სააკაშვილი უკვე 39-ე დღეა შიმშილობს. 6 ნოემბერს, ექსპრეზიდენტის მხარდამჭერი აქციის დაწყებამდე, პენიტენციურმა სამსახურმა გაავრცელა კადრები, სადაც, მათი მტკიცებით, მიხეილ სააკაშვილი "საკვებს იღებს". უწყებამ ვიდეოს გამოქვეყნება "მაღალი საზოგადოებრივი ინტერესით" ახსნა. ექიმები და ომბუდსმენი კი განმარტავენ, რომ ეს არ არის საკვები და არის დანამატი, რაც საერთაშორისო პროტოკოლით არის განსაზღვრული და შიმშილობის დარღვევად არ მიიჩნევა.

ეს ინფორმაცია მანამდე, 5 ნოემბერს იუსტიციის მინისტრმა, რატი ბრეგაძემ გაავრცელა, როცა თქვა, რომ სააკაშვილი გარკვეული დროის შემდეგ ფაფებისა და ნატურალური წვენების მიღებას დათანხმდა. 6 ნოემბერს ამ თემაზე სახალხო დამცველმა განაცხადა, რომ სააკაშვილის პატიმრობის პირობებისა და ჯანმრთელობის შესახებ განსაკუთრებული კატეგორიის პერსონალური მონაცემების გაცემისა და საჯაროდ გამოქვეყნების საკითხს შეისწავლიდა. მანვე აღნიშნა, რომ ექსპრეზიდენტი 30 ოქტომბრიდან წვენებსა და მინერალური შემცველობის პიურეებს სამედიცინო დანიშნულებით, მცირე ოდენობით იღებდა. მიღებული ინფორმაციის საფუძველზე ომბუდსმენი აცხადებდა, რომ სააკაშვილი პირველი ოქტომბრის შემდეგ უწყვეტად შიმშილობს და საკვებს არ იღებს.

• სააკაშვილმა გვითხრა, რომ საკვები დანამატის მიღებაში პენიტენციური სამსახურის სამედიცინო დეპარტამენტის ხელმძღვანელმა დაარწმუნა — ომბუდსმენის მოადგილე

აღსანიშნავია, რომ 5 ნოემბერს სახელმწიფო ინსპექტორის სამსახურმაც გაავრცელა განცხადება, სადაც ნათქვამი იყო, რომ მნიშვნელოვანია დაცული იყოს მოშიმშილე თავისუფლებააღკვეთილი პირის პირადი ცხოვრების ხელშეუხებლობა, მისი პერსონალური, განსაკუთრებით კი, ჯანმრთელობის მდგომარეობის შესახებ მონაცემები. მეორე დღეს, კადრების გავრცელების შემდეგ კი უწყებამ განაცხადა, რომ მათი მოპოვებისა და გავრცელების კანონიერებას შეისწავლის და კიდევ ერთხელ ისაუბრა პირადი ცხოვრების ხელშეუხებლობის დაცვის მნიშვნელობაზე.

თავად სააკაშვილი კადრების გამოქვეყნებას სამარცხვინოს და დანაშაულებრივს უწოდებს. თუმცა, მისივე თქმით, ვიდეოს გავრცელებით მას ვერაფერი დააკლეს, ხალხი დარწმუნდა, რომ შიმშილობს და "საუკეთესო ფორმაში არ იმყოფება". ის განმარტავს, რომ კადრებში ჩანს, როგორ იღებს დანამატებს სასიცოცხლო მაჩვენებლების დასარეგულირებლად, რაც მანამდეც იყო ცნობილი.