სოციალური სამართლიანობის ცენტრი შინაგან საქმეთა სამინისტროს ჭყონდიდში კანონის უზენაესობისა და სოციალური მშვიდობის განუხრელი დაცვისკენ მოუწოდებს. მათი განცხადებით, ჭყონდიდის ეპარქიაში სასულიერო პირების სისტემური დევნა მიმდინარეობს და პოლიცია ვერ ახერხებს კანონის მიუმხრობელი დამცველის როლის შესრულებას.

"ჭყონდიდის ეპარქიაში კრიტიკული აზრის მქონე სასულიერო პირების მიმართ მოპყრობამ სისტემური დევნის ხასიათი მიიღო. თუმცა, სამწუხაროდ, საპატრიარქო ჭყონდიდის ეპარქიაში შექმნილ კრიზისზე სათანადო რეაგირებას არ ახდენს და ჭყონდიდის ეპარქიის დროებით მმართველად დანიშნული ლეჩხუმისა და ცაგერის ეპისკოპოსი სტეფანეს რადიკალური გადაწყვეტილებები, რომელიც მრევლის შიგნით დაძაბულობის მიზეზიც ხდება, ეკლესიის ადმინისტრაციის მხრიდან სრულად არის შეწყნარებული", — ვკითხულობთ განცხადებაში.

სოციალური სამართლიანობის ცენტრმა ადგილზე შეისწავლა 5-7 ნოემბერს მარტვილის რამდენიმე მონასტერში განვითარებული მოვლენები. მათი თქმით, პროცესებზე დაკვირვებამ აჩვენა, რომ განკვეთილი სასულიერო პირები სალხინოს მონასტერში საცხოვრებელი სივრცეებიდან საპატრიარქომ, ძალადობრივი ჯგუფების გამოყენებით, სათანადო პროცედურების გარეშე გამოასახლა.

"ჩვენი ორგანიზაცია ვერ შევა განკვეთისა და განკვეთილი სასულიერო პირების/ბერების საცხოვრისთან დაკავშირებული გადაწყვეტილებების საეკლესიო სამართლებრივ განხილვაში, თუმცა მოქმედი კანონმდებლობის პერსპექტივიდან ცალსახაა გამოსახლების პროცედურის დარღვევა საპატრიარქოსა და სახელმწიფოს მხრიდან. აშკარაა, რომ განსახილველ შემთხვევაში სასულიერო პირების იძულებითი გამოსახლება საპატრიარქომ დაიწყო ისე, რომ არ ჰქონდა დაწყებული გამოსახლების არც სამოქალაქო და არც სისხლის სამართლებრივი პროცედურა და საქართველოს საპატრიარქოს წარმომადგენლებმა, სამართლებრივი პროცედურების გვერდის ავლით, იძულებით დაატოვებინეს საცხოვრებელი ადგილი სასულიერო პირებს", — აცხადებენ ორგანიზაციაში.

ცენტრი ადგილობრივი პოლიციის როლის პრობლემურობაზეც ამახვილებს ყურადღებას. განცხადებაში აღნიშნულია, რომ პოლიცია განკვეთილი სასულიერო პირების მიმართ ძალადობისა და დევნის ფაქტებზე სათანადო სამართლებრივი რეაგირებას დემონსტრაციულად არ ახდენს. ორგანიზაცია მოუწოდებს შსს-ს, ჭყონდიდში მიმდინარე მოვლენებზე, მოახდინოს ადეკვატური სამართლებრივი რეაგირება და ამ პროცესში განუხრელად დაიცვას კანონის უზენაესობისა და სახელმწიფოს რელიგიური ნეიტრალიტეტის პრინციპები. მათივე განცხადებით, საჭიროა შსს-ს მენეჯმენტმა გაითვალისწინოს ადგილობრივი პოლიციის წინაშე მდგარი სირთულეები და მიიღოს ადეკვატური ინსტიტუციური ზომები პოლიციის მხრიდან ეპარქიაში შექმნილი კონფლიქტების ეფექტიანი პრევენციისა და მართვისთვის.

ორგანიზაცია მოუწოდებს საქართველოს პროკურატურასაც, დაიწყოს გამოძიება 5-7 ნოემბერს მიმდინარე მოვლენების დროს დევნისა და სამსახურეობრივი გულგრილობის ფაქტებზე.

გარდა ამისა, ცენტრი მოუწოდებს საქართველოს საპატრიარქოს, გაიაზროს ჭყონდიდის ეპარქიაში მიმდინარე პროცესების მძიმე სოციალური შედეგები მრევლისთვის და მთლიანად ადგილობრივი საზოგადოებისთვის და მიიღოს ყველა ზომა ეპარქიაში არსებული კრიზისის მშვიდობიანი გადაწყვეტისთვის. ასევე, დაიცვას ბერებისა და მონაზვნების სოციალური ინტერესები და უსაფრთხოება ამ პროცესში.

19 სექტემბერს მეუფე სტეფანემ მასთან დაპირისპირებული 6 სასულიერო პირი ეკლესიიდან განკვეთა. ბერებმა მონასტრის დატოვებაზე უარი თქვეს და ადგილზე რჩებოდნენ. 3 ნოემბერს მათ საპატრიარქოსგან წერილი მიიღეს, რომ 4 ნოემბრამდე შეეწყვიტათ "საეკლესიო ქონებით უკანონოდ სარგებლობა და განკარგვა". წერილს ხელს პატრიარქის მდივანი, მიქაელ ბოტკოველი აწერდა. ბერებმა ისევ უარი თქვეს ტერიტორიიდან გასვლაზე.

5 ნოემბერს ისინი მონასტერში აღარ შეუშვეს, რასაც დაპირისპირება და ხმაური მოყვა. ადგილზე მობილიზებული იყო პოლიციაც. ბერები ამბობენ, რომ იბრძოლებენ და მონასტერს არ დატოვებენ.

7 ნოემბერს ჭყონდიდის მიტროპოლიტმა სტეფანემ სალხინოს მონასტრიდან ბერების გაშვება "ავაზაკთა კრებულისგან გათავისუფლებას" შეადარა. ამ მონასტრის ამბიონიდან მან განაცხადა, რომ ეს ყველასთვის გაფრთხილება უნდა იყოს და დღეიდან ცხოვრება გაგრძელდება "ეკლესიისადმი მორჩილებით და პატრიარქის მოხსენიებით". იმავე დღეს დაპირისპირებისას პოლიციამ 7 პირი დაკაავა. უწყების განმარტებით, 6 მათგანი ადმინისტრაციული წესით პოლიციის კანონიერი მოთხოვნის დაუმორჩილებლობისა და წვრილმანი ხულიგნობისთვის, ხოლო ერთი პოლიციელზე თავდასხმისთვის არის დაკავებული.