ჭყონდიდელი მიტროპოლიტი სტეფანეს მიერ ეპარქიიდან განკვეთილმა სასულიერო პირებმა საპატრიარქოსგან წერილი მიიღეს, რომლის მიხედვით, მათ ხვალამდე, 4 ნოემბრამდე უნდა შეწყვიტონ "საეკლესიო ქონებით უკანონოდ სარგებლობა და განკარგვა". წერილს ხელს პატრიარქის მდივანი, მიქაელ ბოტკოველი აწერს.

წერილის ადრესატები არიან:

  • ნასყიდა ღუდუშაური (ყოფილი ბერ-დიაკვანი პეტრე);
  • მიხეილ მდივანი (ყოფილი მონაზონი ათინოგენი);
  • ტარიელ გვილავა (ყოფილი მონაზონი დანიელი);
  • თამაზ ხულუხია (ყოფილი მონაზონი ამბროსი);
  • ბაჩუკი ხელაია (ყოფილი მონაზონი დავითი);
  • ბათა ავთანდილ გვილავა (ყოფილი მონაზონი ბასილი);
  • მარკოზ წულაია (ყოფილი მონაზონი მარკოზი).

"საქართველოს სამოციქულო ავტოკეფალური მართლმადიდებლური ეკლესიის საქმიანობის ადმინისტრირებაზე პასუხისმგებელი და საეკლესიო ქონების კანონიერი მესაკუთრე, საქართველოს საპატრიარქო, არ დაუშვებს, რომ მღვდელმსახურებას შეეშალოს ხელი და საეკლესიო ქონებით ისარგებლოს ან განკარგოს არაუფლებამოსილმა პირებმა.

ზემოაღნიშნულიდან გამომდინარე, მოგიწოდებთ, 2021 წლის 4 ნოემბრამდე შეწყვიტეთ საეკლესიო ქონებით უკანონოდ სარგებლობა და განკარგვა", — წერია წერილში.

მამა ათინოგენი, რომელიც განკვეთილ მღვდელმსახურებს შორის ერთ-ერთია, On.ge-სთან აცხადებს, რომ მისთვის ეს გადაწყვეტილება და მიქაელ ბოტკოველის ხელმოწერილი წერილი მიუღებელია.

"კიდევ ერთხელ დავრწმუნდი იმაში, რომ ესენი ადამიანების სულზე, მონაზვნურ ცხოვრებაზე [არ ფიქრობენ], ჩვენ ხომ აღთქმადადებული ადამიანები ვართ, მონასტრის გარეშე ჩვენი ცხოვრება არ შეიძლება. რომელი ეკლესია არის, რომელიც ჩემსა და ღმერთს შორის დადებულ აღთქმაში ჩაერევა და მისგან განმაშორებს", — ამბობს ის.

მამა ათინოგენის თქმით, განკვეთილი მონაზვნები ელოდებიან სინოდის განკარგულებას და პასუხებს კითხვებზე, შესაბამისად, მამა მიქაელ ბოტკოველი არ უნდა იღებდეს თავის თავზე პასუხისმგებლობას და სინოდის გადაწყვეტილებამდე წერილს არ უნდა აგზავნიდეს.

"ჩვენ ველოდებით სინოდის გადაწყვეტილებას, თუ რას გადაწყვეტენ ისინი იმ ბრალდებაზე, რომელიც მეუფე პეტრემ წარადგინა და ყველა სხვა ამბავზე, დაწყებული ციანიდის საქმიდან. გვპირდებოდნენ, რომ შეიქმნებოდა კომისია, ყველაფერს გამოიძიებდნენ და თავის სახელს დაარქმევდნენ. სად არის ეს დადგენილება? სად არის სინოდის განკარგულება? ბოტკოველი რატომ იღებს თავის თავზე ასეთ პასუხისმგებლობას, რომ სინოდის გადაწყვეტილებამდე ავრცელებს ასეთ გადაწყვეტილებას", — ამბობს On.ge-სთან საუბრისას მონაზონი.

საპატრიარქოს პოზიციის გასაგებად On.ge დაუკავშირდა მიქაელ ბოტკოველს და ანდრია ჯაღმაიძეს, ისინი სატელეფონო ზარსა და მესიჯებს არ პასუხობენ.

რა ხდება ჭყონდიდის ეპარქიაში

ჭყონდიდის ეპარქიაში დაპირისპირება მიტროპოლიტ პეტრე ცაავასთვის მღვდელმსახურების შეჩერებიდან მალევე დაიწყო. 2019 წელს, სინოდის სხდომის დასრულების შემდეგ მან თქვა, რომ ეკლესიაში "მამათმავლობის ცოდვის" მხილების გამო პატრიარქმა მღვდელმთავრობიდან გადააყენა. ის ეპარქიას ჩამოაშორეს და "მოსანანიებლად" შიომღვიმის მონასტერში განამწესეს.

მეუფე პეტრემ შიომღვიმეში წასვლაზე უარი განაცხადა და ეპარქია მის შემცვლელს, ეპისკოპოს გრიგოლ კაციას გადააბარა. 2021 წლის თებერვალში კი ცნობილი გახდა, რომ ჭყონდიდის ეპარქიის მმართველობას ცაგერისა და ლენტეხის ეპარქიის მმართველი, მიტროპოლიტი სტეფანე შეითავსებდა. ეპარქიაში დაპირისპირება სწორედ ამის შემდეგ გამწვავდა. მიიჩნევა, რომ ის სასულიერო პირები, რომლებსაც მეუფე სტეფანემ მღვდელმსახურება შეუჩერა, პეტრე ცაავას მხარდამჭერები არიან. ამასთან, პეტრე ცაავას მრევლის წევრები აცხადებდნენ, რომ მეუფე სტეფანეს წირვებზე დასწრებას არ აპირებდნენ.

8 მარტს მეუფე სტეფანემ ეპარქიის წევრები მოიწვია, მას რეზიდენციის მეორე სართულზე კრება ჰქონდა და მოქალაქეთა ნაწილი შესვლას ცდილობდა, რა დროსაც მეორე სართულის აივნის მოაჯირი დაინგრა და 10-მდე ადამიანი გადავარდა. შემთხვევის შედეგად 8 ადამიანი დაშავდა, მათ შორის, ჟურნალისტებიც.

11 სექტემბერს მიტროპოლიტმა სტეფანემ ბრძანება გამოსცა და 6 მღვდელმსახური სასულიერო დასიდან განკვეთა. ბრძანების თანახმად, განკვეთილ მონაზვნებს აეკრძალათ მსახურება, საპატრიარქოს კუთვნილებაში არსებულ შენობებში ცხოვრება, საქმიანობა და საეკლესიო მიწებით სარგებლობა.

მანამდე, 4 აპრილს, სტეფანე კალაიჯიშვილმა 5 სასულიერო პირი ეკლესიის წინააღმდეგ ამბოხში დაანაშაულა და მღვდელმსახურება აუკრძალა. 8 მარტს კი ორ დიაკონს — კონსტანტინე გაბისონიასა და პეტრე ღუდუშაურს — მღვდელმსახურება შეუჩერა. საპატრიარქოს ინფორმაციით, ბრძანება მღვდელმთავარმა მას შემდეგ გამოსცა, რაც დიაკვნებმა, წერილობითი თუ პირადი გაფრთხილებების მიუხედავად, უარი განაცხადეს ეპარქიის ახალ მმართველ მიტროპოლიტთან ერთად მსახურებაზე.

გარდა ამისა, მიტროპოლიტმა სტეფანემ მონაზონი სოსანა ბოლქვაძე და მორჩილი ნინო გამყრელიძე მარტვილის წმინდა ნინოს სახელობის დედათა მონასტრიდან გარიცხა და სინანულისთვის ლასურიაშის ღვთისმშობლის შობის სახელობის დედათა მონასტერში განაწესა. ისინი მონასტრიდან გამოაგდეს და შენობაში მთელი ღამის განმავლობაში არ უშვებდნენ. მონაზონი სოსანა და მორჩილი ნინო ახლა სხვა ეკლესიამ შეიფარა.