პოლიციამ მარტვილში მომხდარი დაპირისპირებისას სულ 7 პირი დაკაავა. უწყების განმარტებით, 6 მათგანი ადმინისტრაციული წესით პოლიციის კანონიერი მოთხოვნის დაუმორჩილებლობისა და წვრილმანი ხულიგნობისთვის, ხოლო ერთი პოლიციელზე თავდასხმისთვის არიან დაკავებული.

ასევე, უწყებამ გამოძიება დაიწყოს შინაგან საქმეთა სამინისტროს ბალანსზე დარიცხული ავტომობილის დაზიანების საქმეზე, სისხლის სამართლის კოდექსის 187-ე მუხლით.

ჭყონდიდის ეპარქიაში დილიდან ხმაური და დაპირისპირება იყო, სასულიერო პირები მონასტერში დაბრუნებას ითხოვდნენ. ადგილზე პოლიციამ რამდენიმე პირი დააკავა, მათ შორის ერთი სასულიერო პირი იყო.

დღეს, 7 ნოემბერს ჭყონდიდის მიტროპოლიტმა სტეფანემ სალხინოს მონასტრიდან ბერების გაშვება "ავაზაკთა კრებულისგან გათავისუფლებას" შეადარა. ამ მონასტრის ამბიონიდან მან განაცხადა, რომ ეს ყველასთვის გაფრთხილება უნდა იყოს და დღეიდან ცხოვრება გაგრძელდება "ეკლესიისადმი მორჩილებით და პატრიარქის მოხსენიებით".

19 სექტემბერს მეუფე სტეფანემ მასთან დაპირისპირებული 6 სასულიერო პირი ეკლესიიდან განკვეთა. ბერებმა მონასტრის დატოვებაზე უარი თქვეს და ადგილზე რჩებოდნენ. 3 ნოემბერს მათ საპატრიარქოსგან წერილი მიიღეს, რომ 4 ნოემბრამდე შეეწყვიტათ "საეკლესიო ქონებით უკანონოდ სარგებლობა და განკარგვა". წერილს ხელს პატრიარქის მდივანი, მიქაელ ბოტკოველი აწერდა. ბერებმა ისევ უარი თქვეს ტერიტორიიდან გასვლაზე.

მომდევნო დღეებში ისინი მონასტერში აღარ შეუშვეს, რასაც დაპირისპირება და ხმაური მოყვა. ადგილზე მობილიზებული იყო პოლიციაც.

მეუფე სტეფანე ამბობს, რომ ვისაც სჭირდება თავშესაფარი, მისცემს ცაგერისა და ლენტეხის ეპარქიაში, მაგრამ არა ჭყონდიდში. მამა ათინოგენი კი პასუხად აცხადებს, რომ არ მოსცილდებიან იმ ადგილს, სანამ მონასტერში არ შებრუნდებიან.