ოკეანეთის სახელმწიფო ტუვალუს საგარეო საქმეთა მინისტრმა კლიმატის ცვლილების გაეროს ორგანიზებულ კონფერენციაზე გლაზგოში დასწრება ვერ შეძლო, ამიტომ ღონისძიებაზე საკუთარი სიტყვით გამოსვლის ვიდეოჩანაწერის გაგზავნა გადაწყვიტა. უჩვეულო ამ ამბავში არაფერი არ იქნებოდა, რომ არა ფორმა, რომლითაც საიმონ კოუფემ განცხადების გაკეთება გადაწყვიტა.

მინისტრი თავისი ტრიბუნითურთ ზღვაში მუხლამდე შევიდა და ამგვარად კლიმატის კრიზისის საფრთხეზე მიანიშნა. კოუფემ ასე ასევე ხაზი გაუსვა, რომ ზღვის დონიდან დაბალ სიმაღლეზე მყოფი თავისი ქვეყანა კლიმატის ცვლილების შედეგების ფრონტის ხაზზეა.

როგორც ჩანს, მინისტრის მიზანმა გაამართლა — კოუფეს ფოტოებმა მალევე მოიცვა ინტერნეტსივრცე და ადამიანებს ნამდვილად მიაქცევინა ყურადღება ზღვის დონის მატების პრობლემისკენ, რომელიც ტუვალუსთვის კრიტიკულია.

ვიდეო ფონგაფალეს კუნძულზე, დედაქალაქ ფუნაფუტისთან ახლოსაა გადაღებული. მას კლიმატის ცვლილების სამიტზე გლაზგოში 9 ნოემბერს აჩვენებენ. აღსანიშნავია, რომ კოუფეს გარდა, რეგიონში მყოფი სხვა ქვეყნებიც ემხრობიან უფრო რადიკალური ზომების მიღებას, რათა კლიმატის კრიზისის შედეგები შემცირდეს.

ფოტო: Tuvalu Foreign Ministry / Reuters

ემისიებით გარემოს რამდენიმე მთავარმა დამაბინძურებელმა ნახშირბადის ნარჩენების შემცირების პირობა დადო, ზოგიერთი ქვეყანა კი 2050 წლისთვის ნულოვანი მაჩვენებლის მიღწევასაც აპირებს. ამის მიუხედავად, ოკეანეთის ქვეყნები დაუყოვნებლივ მოქმედებას ითხოვენ, რადგან ზღვის დონიდან დაბალ სიმაღლეზე ყოფნის გამო მათი გადარჩენის შანსები, სხვებთან შედარებით, მცირეა.

აღსანიშნავია, რომ რეგიონის კუნძულოვანი სახელმწიფოების მესამედმა სამიტზე ოფიციალური წარმომადგენლის გაგზავნა კოვიდშეზღუდვების გამო ვერ შეძლო. ამის გამო, ბევრი მათგანი ღელავდა, რომ კონფერენციაზე სათანადოდ ვერ წარმოჩინდებოდა შექმნილი სიტუაციისა და მოსალოდნელი საფრთხეების სიმწვავე ოკეანეთის ქვეყნებისთვის.

ოქტომბრის თვეში მსოფლიო ბანკმა განაცხადა, რომ ზღვის დონის მოსალოდნელი მატება, შესაძლოა, მარშალის კუნძულების სტატუსზე აისახოს. 59-ათასიანი მოსახლეობისა და 180 კვ.კმ. ფართობის მქონე ქვეყანა, რომელიც 1 157 კუნძულს აერთიანებს, ერთ-ერთი ყველაზე დაუცველი ტერიტორიაა კლიმატის კრიზისის შედეგების წინაშე.

ასევე იხილეთ: