საქართველოს კომუნიკაციების ეროვნულმა კომისიამ მიიჩნია, რომ New Studio-ს მიერ დამზადებული ვიდეორგოლი "სანტას ბოლო გოზინაყი" ავტორის გამოხატვის თავისუფლების ნაწილია და დაუშვებელი პროდუქცია არ არის. ვიდეოს შესწავლის მოთხოვნით, კომუნიკაციების კომისიას ორგანიზაციამ პარტნიორობა ადამიანის უფლებებისთვის მიმართა. ორგანიზაცია მიიჩნევდა, რომ ვიდეორგოლი შეიცავდა სასტიკი ძალადობის სცენებს და ბავშვის ფსიქიკისთვის დამაზიანებელი იყო.

საჩივრის ავტორი ითხოვდა, რომ საქართველოში GE დომეინის გამცემ კომპანიას - კავკასუს ონლაინის დავალებოდა ვიდეორგოლზე, როგორც არასრულწლოვანთათვის დაუშვებელ პროდუქციაზე, შესაბამისი ნიშანდების დადება.

გადაწყვეტილების მიღებისას კომისიამ იხელმძღვანელა "ელექტრონული კომუნიკაციების სფეროში მომსახურების მიწოდებისა და მომხმარებელთა უფლებების დაცვის შესახებ რეგლამენტის" იმ რეგულაციით, რომლითაც დაუშვებელი პროდუქცია არის ელექტრონული კომუნიკაციების მეშვეობით გადაცემული პორნოგრაფია, სიძულვილისა და ძალადობის განსაკუთრებით მძიმე ფორმების ამსახველი, პირადი ცხოვრების შემლახველი, ცილისმწამებლური, შეურაცხმყოფელი, უდანაშაულობის პრეზუმფციის დამრღვევი, უზუსტო, საავტორო უფლებებისა და საქართველოს კანონმდებლობის დარღვევით გადაცემული სხვა პროდუქცია.

ვიდეო რგოლი, რომელიც საჩივრის ავტორთა აზრით, შეიცავდა სასტიკი ძალადობის სცენებს განთავსებული იყო ვებგვერდებზე: marketer.ge და vtube.ge გვერდებზე.

New Studio-ს რეკლამის გავრცელების შეწყვეტისკენ მოუწოდებდა სახალხო დამცველი უჩა ნანუაშვილი. ის მიიჩნევდა, რომ ინტერნეტით გავრცელებული ვიდეორგოლი, სადაც ქართველი თოვლის ბაბუა სანტა კლაუსს კლავს, მავნე ზეგავლენას ახდენს როგორც მასში მონაწილე ბავშვზე, ასევე სხვა არასრულწლოვნებზე.