ექსპრეზიდენტ მიხეილ სააკაშვილის სამოქალაქო კლინიკაში გადაყვანის მოთხოვნით, იუსტიციის სამინისტროსთან აქცია იმართება. ადგილზე ჟურნალისტები და სამოქალაქო აქტივისტები არიან შეკრებილები.

ნოდარ რუხაძის განცხადებით, აქციის მთავარი გზავნილია, რომ რიგით მოქალაქეებს არ სურთ იყვნენ თანამონაწილეები "იმ მკვლელობაში, რომელსაც ახლა ახორციელებს ქართული ოცნებისა და ბიძინა ივანიშვილის ხელისუფლება". მისი თქმით, გეგმა არის მარტივი — პროტესტი.

როგორც ჟურნალისტი, ნინო ჯანგირაშვილი ამბობს, ქართული ოცნება "კვალიფიციურ მკვლელად" ჩამოყალიბდა და ხალხს ეუბნება, რომ აღარაფრის უფლება აქვთ.

"ჩვენ გვეუბნებიან, რომ ამ ქვეყანაში ჩვენ არაფრის უფლება აღარ გვაქვს და უნდა ვისხდეთ და ვუყუროთ როგორ მოკლავენ ისინი ადამიანებს. ჩვენ გვაქვს მხოლოდ თვითმკვლელობის უფლება და პერიოდულად, ბატონი ბიძინას ქების უფლება. მეტი უფლება ამ ქვეყანაში არავის აღარ აქვს, აბსოლუტურად", — აცხადებს ჯანგირაშვილი TV პირველთან.

ამასთან, ის ასევე აღნიშნავს, რომ მაშინ როდესაც საქართველოს მესამე პრეზიდენტის უფლებები ასე ირღვევა, რიგითი ადამიანის უფლებრივი მდგომარეობა კიდევ უფრო მძიმე იქნება.

"თუ საქართველოს მესამე პრეზიდენტი არის ასეთი დაუცველი, თუ მის მიმართ ირღვევა ამდენი რამ, რომელზეც მიმართულია ყველას ყურადღება, წარმოიდგინეთ, რა მდგომარეობაშია რიგითი ადამიანი. თუ მიხეილ სააკაშვილი არ იმსახურებს სამართლიან სასამართლოს, წარმოგიდგენიათ, რა დღეში ვართ ყველა დანარჩენი?! მიხეილ სააკაშვილი კი არ იმსახურებს სამართლიან სასამართლოს და კლინიკაში გადაყვანას, ჩვენ ვიმსახურებთ, ქართული საზოგადოება, რომ ჩვენ არ გავხდეთ მკვლელობის და ლინჩის წესით გასამართლების თანამონაწილე", — თქვა მან.

სააკაშვილი პირველ ოქტომბერს დააკავეს. ის ბრალს არ აღიარებს, ამიტომ საპატიმროში გადაყვანის შემდეგ შიმშილობა დაიწყო და უკვე 34 დღეა შიმშილობს. მისი პირადი ექიმი აცხადებს, რომ ექსპრეზიდენტს ექიმების მეთვალყურეობა სჭირდება და საჭიროა კლინიკაში გადაყვანა. პენიტენციური სამსახური სააკაშვილს მხოლოდ ციხის კლინიკაში გადაყვანას სთავაზობს, ის უარზეა.

პოლიტიკური პარტიები, ორგანიზაციები, სამედიცინო მუშაკები ხელისუფლებას მისი სამოქალაქო კლინიკაში გადაყვანისკენ მოუწოდებენ. თუმცა სამთავრობო გუნდის განცხადებით, პენიტენციურ დაწესებულებაში შექმნილია ყველა პირობა იმისთვის, რომ პატიმარს უმკურნალონ და ყველა პატიმარს ერთნაირად ექცევიან, ამიტომ სააკაშვილი გამონაკლისი არ იქნება. ექსპრეზიდენტი კი ამბობს, რომ როგორიც არ უნდა იყოს მისი ჯანმრთელობის მდგომარეობა, ციხის საავადმყოფოში გადაყვანა არ სურს.

მისი მონიტორინგისთვის შექმნილი კონსილიუმი თანხმდება, რომ საჭიროების შემთხვევაში, ექსპრეზიდენტი მრავალპროფილურ, მაღალი კლასის კლინიკაში უნდა გადაიყვანონ. სახალხო დამცველი მიიჩნევს, რომ ციხის საავადმყოფო სრულად არ შეესაბამება ამ რეკომენდაციებს და არსებობს რისკები სააკაშვილის უსაფრთხოებაზეც.

პრემიერმინისტრი ექსპრეზიდენტის შიმშილობას დიეტას უწოდებს და იმეორებს, რომ ამაზე საუბარი არ უნდა, თუმცა, მაინც საუბრობს. სწორედ ერთ-ერთი ასეთი განცხადების დროს მან აღნიშნა, რომ ადამიანებს თვითმკვლელობის უფლება აქვთ და სახელმწიფო ამაზე ვერ აიღებს პასუხისმგებლობას. კრიტიკის შემდეგ მან თავისივე სიტყვები უარყო და ამტკიცებდა, რომ არა თვითმკვლელობა, არამედ შიმშილობა იგულისხმა. ამ თემზე ირონიულად საუბრობენ მმართველი გუნდის სხვა წევრებიც. მაგალითად, მამუკა მდინარაძემ თქვა, რომ მოშიმშილე 40 დღე ძლებს და 41-ე დღეს ელოდებიან და სჯერათ, რომ სააკაშვილი ჯანსაღად იქნება. მანვე აღნიშნა, რომ 40 დღე ადამიანი რომ იშიმშილებს და კიდევ კარგად იქნება, ე.ი "სხვა რაღაცაშია საქმე".

პროტესტის ნიშნად სააკაშვილმა უარი თქვა ნებისმიერ სამედიცინო დახმარებასა და ტესტების გაკეთებაზე. თუმცა დღეს, 3 ნოემბერს მისმა ექიმმა განაცხადა, რომ ის თავს სუსტად გრძნობს და ანალიზების გაკეთებაზე დაითანხმეს.