ექსპრეზიდენტ მიხეილ სააკაშვილის პირადი ექიმი ნიკოლოზ ყიფშიძე ამბობს, რომ სააკაშვილი გლდანის ციხეში მკურნალობის კატეგორიულად წინააღმდეგია. ექიმი რუსთავის პენიტენციური დაწესებულებიდან რამდენიმე წუთის წინ გამოვიდა.

"ვილაპარაკეთ ცოტა ხანი. ჯანმრთელობის მდგომარეობა ისეთივეა, როგორიც გუშინ იყო. გავიარეთ ტესტების ანალიზი. ტესტებით ასე თუ ისე არა უშავს. სავსებით ნორმალური არ არის, მაგრამ მისი შიმშილობის კონტექსტს თუ ავიღებთ არა უშავს", — განაცხადა ექიმმა ციხიდან გამოსვლების შემდეგ.

მიხეილ სააკაშვილი 26 დღეა შიმშილობს. ნიკოლოზ ყიფშიძის ცნობით, კონსილიუმი თანხმდება, რომ საჭიროების შემთხვევაში, ექსპრეზიდენტი მრავალპროფილურ, მაღალი კლასის კლინიკაში უნდა გადაიყვანონ. მისივე ინფორმაციით, ამ საკითხზე კონსილიუმმა ორი საათის განმავლობაში იმსჯელა და განაცხადა, რომ "შეიძლება, ეს ყველაფერი გართულდეს და საჭირო იქნება მისი გადაყვანა საავადმყოფოში".

ამის ფონზე, იუსტიციის მინისტრი, რატი ბრეგაძე აცხადებს, რომ ციხის საავადმყოფოს შეუძლია მოშიმშილე პაციენტის მიღება და მისი ჯანმრთელობის მართვა. მისივე თქმით, მიხეილ სააკაშვილის უსაფრთხოება სრულად დაცული იქნება და უწყება მაქსიმალურად ეცდება, რომ ყველა საჭირო ღონისძიება გატარდეს, რომელიც აუცილებელია "როგორც ამ კონკრეტული, ისე სხვა პატიმრების უსაფრთხოებისთვის".

საწინააღმდეგოს ამბობს სახალხო დამცველი. ომბუდსმენმა შეისწავლა პენიტენციური სამსახურის მე-18 სამედიცინო დაწესებულების მზადყოფნა ექსპრეზიდენტ მიხეილ სააკაშვილის მისაღებად. მისი რწმუნებულების დასკვნის მიხედვით, დაწესებულება სრულად არ შეესაბამება ექიმთა კონსილიუმის რეკომენდაციებს, ასევე, არსებობს რისკები ექსპრეზიდენტის უსაფრთხოებაზეც.