ქართული ოცნების აღმასრულებელი მდივანი, მამუკა მდინარაძე ექსპრეზიდენტ მიხეილ სააკაშვილზე საუბრისას ამბობს, რომ თუ ადამიანი 40 დღე საჭმლის გარეშე გაძლევს, "ე.ი საქმე სხვა რაღაცაშია".

მდინარაძის მტკიცებით, მისი ნათქვამი, რომ ისინი 41-ე დღეს ელოდებიან, რადგან ადამიანი შიმშილობით მხოლოდ 40 დღე ძლებს, მედიამ არასწორად გაავრცელა, რადგან ის არა ცუდზე, არამედ კარგ შედეგებზე საუბრობდა.

"მე დარწმუნებული ვარ და ასეც იქნება, ეს ადამიანი დიდი ხანიც იცოცხლებს და კარგადაც იქნება, მის ჯანმრთელობას და სიცოცხლეს არაფერი დაემუქრება. სხვა შემთხვევაში არც ვიფიქრებდი მსგავსი დაშვების და მსგავსი სიტყვების თქმას [...]

სასაცილო მდგომარეობა იქნება ის, რომ კიდევ ჯანმრთელად და კარგად იქნება და 40 დღე ადამიანი იშიმშილებს და კიდევ კარგად იქნება, ე.ი. სხვა რაღაცაშია საქმე, სხვა რამეზე კი არ ვლაპარაკობდი და ცუდ შედეგებზე, როგორც ეს TV პირველმა დამაბრალა, არამედ, ვსაუბრობდი მისი ჯანმრთელობის კარგ მდგომარეობაზე და ამათმა თქვეს პირიქით, აი, ეს არის მთელი პარადოქსი, არ უნდა მოატყუო ხალხს ასე", — თქვა მან.

მიხეილ სააკაშვილი პენიტენციურ დაწესებულებაში უკვე 34 დღეა შიმშილობს. მან შიმშილობა დაკავების დღიდან გამოაცხადა. მას შემდეგ, რაც ექსპრეზიდენტმა შიმშილობა დაიწყო, ექიმები აღნიშნავენ, რომ მისი ჯანმრთელობის მდგომარეობა სუსტია. მხარდამჭერები და თანაგუნდელები სააკაშვილს შიმშილობის შეწყვეტისკენ მოუწოდებენ.

28 ოქტომბერს სააკაშვილის შიმშილობაზე საუბრისას პრემიერმინისტრმა ირაკლი ღარიბაშვილმა თქვა, რომ ადამიანებს თვითმკვლელობის უფლება აქვთ და სახელმწიფო ამაზე ვერ აიღებს პასუხისმგებლობას.

პოლიტიკური პარტიები, ორგანიზაციები, სამედიცინო მუშაკები ხელისუფლებას ექსპრეზიდენტის სამოქალაქო კლინიკაში გადაყვანისკენ მოუწოდებენ. თუმცა ქართული ოცნება ამაზე უარს ამბობს. ხელისუფლების განცხადებით, პენიტენციურ დაწესებულებაში შექმნილია ყველა პირობა იმისთვის, რომ პატიმარს უმკურნალონ. იუსტიციის მინისტრის, რატი ბრეგაძის თქმით, საჭიროების შემთხვევაში სააკაშვილს სწორედ ციხის სამედიცინო განყოფილებაში გადაიყვანენ. ამის წინააღმდეგია ექსპრეზიდენტი და ამბობს, რომ როგორიც არ უნდა იყოს მისი ჯანმრთელობის მდგომარეობა, უარს აცხადებს ციხის საავადმყოფოში გადაყვანაზე.